კოალიცია „განათლება ყველასათვის-საქართველო“ კანონიდან სიტყვის „ლიბერალური“ ამოღებასთან დაკავშირებით პარლამენტის განათლების კომიტეტს მიმართავს

კოალიცია „განათლება ყველასათვის - საქართველო“ ზოგადი განათლების კანონში ცვლილებებთან დაკავშირებით, კერძოდ, საქართველოში ზოგადი განათლების სფეროში სახელმწიფო პოლიტიკის ძირითადი მიზნების ნაწილში „ლიბერალურ-დემოკრატიული ღირებულებების“ ნაცვლად მხოლოდ დემოკრატიული ღირებულებების დატოვებასა და სიტყვის „ლიბერალური“ ამოღების თაობაზე პარლამენტის განათლების, მეცნიერებისა და კულტურის კომიტეტს წერილით მიმართავს.

როგორც „ინტერპრესნიუსს“ კოალიცია „განათლება ყველასთვის-საქართველოდან“ აცნობეს, თავიანთი გადაწყვეტილებით დეპუტატებმა ქვეყნის განმანათლებელი წინაპრების ძირითადი ორიენტირებიდან გადაუხვიეს.

„პირველ რიგში, გვინდა განვმარტოთ, რომ ლიბერალური დემოკრატია არის სახელმწიფოს მართვის მოდელი, რომელიც მოქალაქისა და ხელისუფლების ურთიერთობებში აღიარებს ადამიანის უფლებათა და ძირითად თავისუფლებათა უპირობო პრიორიტეტულობას. შესაბამისად, აღნიშნული გადაწყვეტილებით კომიტეტის წევრმა დეპუტატებმა ხელი შეუწყვეს ჩვენი ქვეყნის, ჩვენი განმანათლებელი წინაპრების ძირითადი ორიენტირებიდან გადახვევას და ევროპული ოჯახიდან ჩვენს ჩამოშორებას.

საკანონმდებლო ცვლილების განმარტებით ბარათში, ზემოაღნიშნულის საჭიროება დასაბუთებულია გაერო-ს ბავშვთა უფლებათა კონვენციასთან შესაბამისობის აუცილებლობით. ხაზგასმით გვინდა აღვნიშნოთ, რომ გაერთიანებული ერების ორგანიზაციისა და ევროკავშირის ყველა კონვენცია და დეკლარაცია ეყრდნობა, სწორედაც, ლიბერალური დემოკრატიის პრინციპებს და წარმოადგენს მმართველობის ამ ფორმის მონაპოვარს“,-ნათქვამია გავრცელებულ განცხადებაში

ამასთან, კოალიციის ინფორმაციით, საყურადღებოა ორი გარემოება:

„1. განათლების სფეროში არსებული გამოწვევებისა და, თავად ზოგადი განათლების შესახებ კანონის მნიშვნელოვანი ხარვეზების ფონზე, კომიტეტის განხილვის საგანი ხდება კანონის ის პუნქტები, რომლებიც სრულად არის ჰარმონიზებული საერთაშორისო დოკუმენტებთან და განმსჭვალულია თავისუფლების სულისკვეთებით.2. გადაწყვეტილება მიღებულ იქნა მცირე ჯგუფის მიერ, სამოქალაქო საზოგადოებისა და სფეროს ექსპერტების ჩართულობის გარეშე.

ხაზგასმით გვინდა განვაცხადოთ, რომ განათლების პოლიტიკის ფორმირებისა და ცვლილებების განხორციელებისას პრინციპულად მნიშვნელოვანია, როგორც დაინტერესებული მხარეების, ასევე, ფართო საზოგადოების ჩართულობა.

გვინდა მოვუწოდოთ განათლების, მეცნიერებისა და კულტურის კომიტეტის წევრებს, რომ შეწყვიტონ აღნიშნული ინიციატივის განხილვა და მეტი ყურადღება დაუთმონ იმ საკანონმდებლო ნაკლოვანებების აღმოფხვრას, რომლებიც ხელს უშლის საქართველოში ზოგადი განათლების ეროვნული მიზნების მიღწევას!“ - ნათქვამია წერილში.

წერილს ხელს აწერენ ორგანიზაციები: კონსულტაციისა და ტრენინგის ცენტრი (CTC); ასოციაცია სკოლა-ოჯახი-საზოგადოება; PH International საქართველო; საგანმანათლებლო ინიციატივების ქართული ასოციაცია (სიქა); მათემატიკის მასწავლებელთა ასოციაცია; სამოქალაქო განათლების პედაგოგთა ფორუმი; საქართველოს დებატებისა და განათლების ინსტიტუტი (GIDE); უნი.ჯი (Erasmus + ეროვნული ოფისი); ქალთა საინფორმაციო ცენტრი (WIC); განათლების პოლიტიკის, დაგეგმვისა და მართვის საერთაშორისო ინსტიტუტი (EPPM); ლაიონს ქუესტ საქართველო - განათლების ლაბორატორია (LQG); ისტორიის მასწავლებელთა საქართველოს ასოციაცია (იმსა).

ისრაელის ელჩი - საქართველოს ყველა მეგობრისთვის 5 ივლისის მოვლენები აბსოლუტურად შოკისმომგვრელი იყო
ქართული პრესის მიმოხილვა 02.08.2021
ბაკურ კვაშილავა - 19 აპრილის შეთანხმებიდან მმართველი გუნდის გამოსვლა არ ნიშნავს იმას, რომ იგი არ არსებობს - თუ მათ ხმების 43% ვერ მიიღეს, „ქართულ ოცნებას“ მოუწევს ვადამდელი არჩევნების დანიშვნა
გიორგი ხვედელიანი - ვადამდელი არჩევნების დანიშვნას მიშელის ხელშეკრულება კი არა, ქართველი ხალხის ნება გადაწყვეტს
კომპანია "იორკ თაუერსმა" დავით ტურაშვილთან ერთად ახალი კამპანია წამოიწყო
"სამსუნგის" Bespoke მაცივარი - შექმნილია შენთვის, შენ მიერ (R)
GIZ-ის მხარდაჭერით დაგეგმილია გარემოს ეროვნული სააგენტოს ხელშეწყობა თანამედროვე მონიტორინგული სისტემების დანერგვის პროცესში
„ნიკოს ეზო“ და „ფარდაგები რაჭიდან“ - Social Impact Award-ის ფინალისტები საგანმანათლებლო სფეროდან