მაია რჩეულიშვილისთვის შეფარდებული 7-წლიანი სასჯელი ადეკვატურია, ეს მას საშუალებას მისცემს, უკეთ დაფიქრდეს და სწორი გადაწყვეტილება მიიღოს, - ასე გამოეხმაურა სასამართლოს გადაწყვეტილებას ჟურნალისტებთან ერთ-ერთი დაზარალებული მენაშენე ნინო მანველიძე.

როგორც ის აღნიშნავს, დაზარალებულებს სასამართლოს მიერ გამამტყუნებელი განაჩენის გამოტანის მოლოდინი ჰქონდათ.

„რა თქმა უნდა, გამამტყუნებელ განაჩენს ველოდით. ვფიქრობ,მაია რჩეულიშვილისთვის 4 წელი საკმარისი მოტივაცია არ იყო იმისთვის, რომ ჯეროვნად დაფიქრებულიყო. სწორედ, ამიტომ, ვფიქრობ, 7 წლიანი სასჯელი ადეკვატურია, ეს მას საშუალებას მისცემს, უკეთ დაფიქრდეს და სწორი გადაწყვეტილება მიიღოს. რეალურად, შემოუშვას ინვესტორი და არა ისე, როგორც აქამდე ხდებოდა. ასევე, რეალურად აქტიურად ჩაერიოს სახელმწიფო საკითხში, რომ დაზარალებულების დაკმაყოფილება მოხდეს", - განაცხადა მანველიძემ.

ცნობისთვის, "ცენტრ პოინტის" საქმეზე "მიონის" ეპიზოდზე ბრალდებულები, მაია რჩეულიშვილი და ქეთევან ჟორდანია სასამართლომ დამნაშავედ სცნო. მაია რჩეულიშვილს 7 წლით თავისუფლების აღკვეთა შეეფარდა, ქეთევან ჟორდანიას კი, 5 წლით პირობითი მსჯავრი.