არ მგონია, მოსამართლემ განაჩენში ისეთი მოტივაცია მიუთითოს, რომელიც მაია რჩეულიშვილის ბრალეულობაზე მიუთითებს, - ამის შესახებ ჟურნალისტებს მსჯავრდებულ მაია რჩეულიშვილის ადვოკატმა, ბონდო ვათიაშვილმა განუცხადა.

როგორც ის განმარტავს, რჩეულიშვილის მიმართ შეფარდებული გამამტყუნებელი განაჩენი კანონიერი არ არის.

„მოსამართლის დღევანდელ გადაწყვეტილებას, იმის გამო, რომ საქმის დამთავრება ფორსირებულად მოხდა, პრინციპში, ველოდი. ბრალდებულს საბოლოო სიტყვის უფლება არ მიეცა, მას მხოლოდ გუშინწინ გაეგზავნა საქმის მასალები და არ მიეცა გონივრული ვადა, საბოლოო სიტყვისთვის მომზადებულიყო. რაც შეეხება გადაწყვეტილების კანონიერებას, არ ვეთანხმები. არ მგონია, მოსამართლემ ისეთი მოტივაცია მიუთითოს განაჩენში, რომელიც მაია რჩეულიშვილის ბრალეულობაზე მიუთითებს", - განაცხადა ვათიაშვილმა.

ის სასამართლოს დღევანდელი გადაწყვეტილების გასაჩივრებას გეგმავს.

„აუცილებლად გავასაჩივრებთ. ნაღდობის ხელშეკრულების პირობები ნამდვილად დაირღვა და დღესაც არ არის ობიექტი აშენებული, მაგრამ ეს იმას არ მიუთითებს, რომ მაია რჩეულიშვილი ამ თანხებს დაეუფლა და მიითვისა", - განაცხადა ვათიაშვილმა.

ცნობისთვის, "ცენტრ პოინტის" საქმეზე "მიონის" ეპიზოდზე ბრალდებულები, მაია რჩეულიშვილი და ქეთევან ჟორდანია სასამართლომ დამნაშავედ სცნო.

მაია რჩეულიშვილს 7 წლით თავისუფლების აღკვეთა შეეფარდა, ქეთევან ჟორდანიას კი, 5 წლით პირობითი მსჯავრი.