უზენაესი სასამართლო გადაწყვეტს, „ცენტრ პოინტის“ საქმეზე „მიონის“ ეპიზოდზე“ მსჯავრდებულ მაია რჩეულიშვილისთვის შეფარდებული 7 წლის ათვლა როდის დაიწყება.

როგორც საქმის პროკურორი, დავით გუმბერიძე „ინტერპრესნიუსთან“ საუბარში აცხადებს, მას შემდეგ, რაც სასამართლოს დღევანდელი გადაწყვეტილება ყველა ინსტანციას მოივლის, უზენაესი სასამართლო გადაწყვეტს, დღეს შეფარდებული სასჯელი სხვა ეპიზოდზე რჩეულიშვილისთვის მისჯილ 4 წელს, საიდანაც მას 3 წელი უკვე მოხდილი აქვს, შთანთქავს თუ არა.

„მას შემდეგ, რაც საქმე ყველა ინსტანციას მოივლის, უზენაესი სასამართლო იმსჯელებს ის შთანთქმის პრინციპს გამოიყენებს, თუ მაია რჩეულიშვილს პირდაპირ 7 წელს დაუნიშნავს.

იქიდან გამომდინარე, რომ 2014-2016 წლებში ჩადენილი ეპიზოდია, სასამართლოს შეუძლია 7 წლიანი სასჯელი პირდაპირ დღევანდელი დღიდან, 10 აპრილიდან ათვალოს, ან შთანთქმა გამოიყენოს“, - განაცხადა გუმბერიძემ.

ცნობისთვის, "ცენტრ პოინტის" საქმეზე "მიონის" ეპიზოდზე ბრალდებულები, მაია რჩეულიშვილი და ქეთევან ჟორდანია სასამართლომ დამნაშავედ სცნო.

მაია რჩეულიშვილს 7 წლით თავისუფლების აღკვეთა შეეფარდა, ქეთევან ჟორდანიას კი, 5 წლით პირობითი მსჯავრი.