სს „საქართველოს ნავთობისა და გაზის კორპორაციამ“ ბუნებრივი გაზის გაყიდვაზე აუქციონი გამოაცხადა და მასში მონაწილეობის მისაღებად იწვევს ყველა დაინტერესებულ პირს.

საქართველოს ნავთობისა და გაზის კორპორაციის ინფორმაციით, ბუნებრივი გაზის გაყიდვა განხორცილდება შემდეგ ლოტებად:

ლოტები #1 - #10 თითოეული ლოტის ოდენობა შეადგენს 1 000 000 კუბურ მეტრ ბუნებრივ გაზს;

ლოტები #11 - #15 თითოეული ლოტის ოდენობა შეადგენს 2 000 000 კუბურ მეტრ ბუნებრივ გაზს;

ლოტი #16 და #17 თითოეული ლოტის ოდენობა შეადგენს 5 000 000 კუბურ მეტრ ბუნებრივ გაზს.

აუქციონის მონაწილეებს შორის ვაჭრობისას საწყისი ფასი შეადგენს 618,54 ლარს ყოველ 1 000 (ათას) მ³ ბუნებრივ გაზში (დღგ-ს გარეშე).

სააუქციონო ვაჭრობა იწყება „საწყისი ფასით“ და გრძელდება „საწყისი ფასის“ 5,38 ლარის ბიჯით გაზრდის პრინციპით.

აუქციონში მონაწილეობის მსურველმა, საჭირო დოკუმენტაცია კორპორაციაში უნდა წარმოადგინოს 2019 წლის 17 აპრილის 14:00 საათამდე (თბილისის დროით). აუქციონი ჩატარდება ამავე დღეს 16:00 საათზე (თბილისის დროით), სს „საქართველოს ნავთობისა და გაზის კორპორაციის“ ადმინისტრაციულ შენობაში. (ქ.თბილისი, კახეთის გზატკეცილი N 21).

აუქციონის შესახებ ინფორმაციის მიღება შესაძლებელია ინტერნეტ გვერდზე - www.gogc.ge