ბიზნესისა და ტექნოლოგიების უნივერსიტეტის აკადემიური საბჭოს წევრი, ასოცირებული პროფესორი, სემეკის წევრი მაია მელიქიძე მონაწილეობას მიიღებს Theodor-Heuss-Kolleg-ის ორგანიზებით გამართულ დისკუსიაში „სამოქალაქო საზოგადოების მომავალი“.
სემეკის ინფორმაციით, დისკუსიაზე მაია მელიქიძე ისაუბრებს სამოქალაქო საზოგადოების განვითარებისა და გამოწვევების შესახებ. დისკუსიაში, ასევე მონაწილეობას მიიღებენ საქართველოში გერმანიის საელჩოსა და სხვადასხვა ორგანიზაციების წარმომადგენლები ცენტრალური და აღმოსავლეთ ევროპის ქვეყნებიდან.
„Theodor-Heuss-Kolleg-ის საერთაშორისო ქსელი ორგანიზებას უწევს სამოქალაქო საზოგადოების განვითარებაში ახალგაზრდების ჩართულობას ცენტრალური, აღმოსავლეთ და სამხრეთ-აღმოსავლეთ ევროპისა და ჩრდილოეთ აფრიკის ქვეყნებიდან. პროექტის მიზანია დემოკრატიული ფასეულობების განვითარება, სამოქალაქო საზოგადოებების გამოწვევების შესახებ დაინტერესებული პირების ინფორმირება“, - ნათქვამია აღნიშნულ ინფორმაციაში.
დისკუსია 11 აპრილს, 16:30 საათზე, „ფაბრიკაში“ გაიმართება.