ფრაქცია "ქართული ოცნების" თავმჯდომარის, მამუკა მდინარაძის განცხადებით, შეუძლებელია პარლამენტმა მხარი დაუჭიროს ეკა ბესელიას და მისი თანამოაზრე დეპუტატების მიერ "საერთო სასამართლოების შესახებ" მომზადებულ კანონპროექტს.
როგორც მდინარაძემ ჟურნალისტებს განუცხადა, 13 დეპუტატის მიერ მომზადებული კანონპროექტი არაკონსტიტუციურია და პროექტის მიხედვით, იუსტიციის საბჭო სასამართლოში ხდება კანცელარია. მდინარაძე მიიჩნევს, რომ კანონპროექტის განხილვა ფორმალურია.
"ამ საკითხზე პარლამენტმა პირველი მოსმენით უკვე მიიღო კანონპროექტი და ვენეციის კომისიის დასკვნას ველოდებით. აქედან გამომდინარე, შეუძლებელია, რომ იმ პროექტის მხარდაჭერაზე ვიმსჯელოთ, რომელიც წარადგინეს. ეს პოლიტიკური დღის წესრიგის შექმნის საშუალებაა, სხვა მხრივ, თავად ეკა ბესელიამ, როგორც იურისტმა კარგად იცის, რომ ამ თემას პერსპექტივა არ აქვს", - განაცხადა მდინარაძემ.
ეკა ბესელიას კანონპროექტის გათვალისწინებით, კანდიდატთა წარსადგენად საჭირო იქნება იუსტიციის უმაღლესი საბჭოს როგორც მოსამართლე, ისე არამოსამართლე წევრების მხარდაჭერა.
გარდა ამისა, შეიქმნება სპეციალური სამუშაო ჯგუფი, რომელშიც წარმოდგენილნი იქნებიან სახალხო დამცველის, ადვოკატთა ასოციაციის, არასამთავრობო ორგანიზაციების და სამეცნიერო წრეების წარმომადგენლები. კანდიდატთა შერჩევის მეორე ეტაპზე სწორედ აღნიშნული ჯგუფი იმუშავებს, რის შემდეგაც პროცესი პარლამენტის იურიდიულ საკითხთა კომიტეტში გადაინაცვლებს.