ავტობუსი, რომელიც კრწანისის ქუჩაზე, ბორდიურზე ავარდა, თბილისის სატრანსპორტო სამსახურმა შემთხვევის ადგილიდან ცოტა ხნის წინ გაიყვანა.
როგორც ავტობუსის მძღოლი აცხადებს, ავტობუსს ტექდათვალიერება გავლილი ჰქონდა და მისთვის გაუგებარია რამ გამოიწვია მისი მწყობრიდან გამოსვლა.
„არ მესმის რა მოხდა, უცებ შევარდა ბორდიურზე. ხელოსანი შეამოწმებს", -განაცხადა ავტობუსის მძღოლმა "ინტერპრესნიუსთან" საუბარში.
ცნობისთვის, კრწანისის ქუჩაზე, ავტობუსი გზის სავალი ნაწილიდან გადავიდა და ბორდიურზე ავარდა. როგორც "ინტერპრესნიუსს" შინაგან საქმეთა სამინისტროში განუცხადეს, შემთხვევის შედეგად არავინ დაშავებულა. მათივე ცნობით, ავტობუსის მძღოლს ადმინისტრაციული წესების დარღვევისთვის ჯარიმა დაეკისრება.