გორში 9 წლის ნანიკო ბერიაშვილის მკვლელობის საქმეზე ბრალდებულ იაგო ნებიერიძის საქმეზე დღეს თბილისის საქალაქო სასამართლოში თავად ბრალდებულის მობილური ტელეფონიდან ამოღებული ვიდეოჩანაწერი გამოიკვლიეს.
აღნიშნულის შესახებ „ინტერპრესნიუსს" საქმის პროკურორმა, ნანა გუგუტიშვილმა განუცხადა.
როგორც ის აღნიშნავს, დღეს გამოკვლეული ვიდეოჩანაწერი, ნებიერიძისთვის წარდგენილ ორივე ბრალდებას ადასტურებს.
„დღევანდელ პროცესზე ბრალდების მხარემ 8 მოწმე წარმოადგინა, წარმოდგენილი იყვნენ ექსპერტ-კრიმინალისტები, ასევე ექსპერტი, რომელმაც საინფორმაციო ტექნიკური ექსპერტიზა ჩაატარა. ასევე დაიკითხნენ გამომძიებლები, რომლებმაც სასამართლოს იმ საგამოძიებო და საპროცესო მოქმედებებზე უამბეს, რომლებშიც მონაწილეობა მიიღეს. ასევე, გამოვიკვლიეთ ვიდეოჩანაწერი და გარკვეული დოკუმენტების ნაწილი", - განაცხადა გუგუტიშვილმა.
შეგახსენებთ, რომ გორში 9 წლის ნანიკო ბერიაშვილი 25 ოქტომბერს გაუჩინარდა. ის რამდენიმე საათში სამართალდამცველებმა გარდაცვლილი იპოვეს. აღნიშნულთან დაკავშირებით, 33 წლის, წარსულში ნასამართლევი იაგო ნებიერიძე დააკავეს.
იაგო ნებიერიძეს ბრალი წარდგენილი აქვს სისხლის სამართლის კოდექსის 138-ე მუხლის მესამე ნაწილის "გ" ქვეპუნქტით, რაც გულისხმობს სექსუალური ხასიათის სხვაგვარი ქმედების ჩადენას.
ნებიერიძეს ასევე ბრალი წარდგენილი აქვს სსკ-ის 109-ე მუხლით, რაც დამამძიმებელ გარემოებაში განზრახ მკვლელობას გულისხმობს.