ვენეციის კომისიის დასკვნის გამოქვეყნებამდე იურიდიულ საკითხთა კომიტეტის ჩანიშვნა კანონპროექტის განსახილველად, სამწუხაროდ, არ მიტოვებს იმის განცდას, რომ მმართველ პარტიას სურს ეს პროცესი ლოგიკურ დასასრულამდე ისე მიიყვანოს, რაც სასამართლოს დამოუკიდებლობისთვის იქნება უკეთესი,- ამის შესახებ „ინტერპრესნიუსს“ „ახალგაზრდა იურისტთა ასოციაციის“ თავმჯდომარემ, სულხან სალაძემ განუცხადა, როდესაც გამოეხმაურა იმას, რომ უზენაესი სასამართლოს მოსამართლეობის კანდიდატების შერჩევასთან დაკავშირებით მმართველი გუნდის მიერ მომზადებული კანონპროექტის მეორე მოსმენით განხილვა 15 აპრილს ჩაინიშნა.

მისი თქმით, ამ საკითხისადმი ასეთი დამოკიდებულებით ვლინდება ის, თუ რამდენად ყურადღებით უდგება მმართველი პარტია დამოუკიდებელი მართლმსაჯულების არსებობას ქვეყანაში.

„ჩვენ ყველას გვახსოვს, როდესაც მმართველი პარტიის წარმომადგენლები საუბრობდნენ, რომ მხოლოდ პირველი მოსმენით გაივლიდნენ ამ საკითხს და მეორე მოსმენისას დაელოდებოდნენ ვენეციის კომიის დასკვნას. გავიგეთ, რომ იურიდიულ საკითხთა კომიტეტის ხდომა ორშაბათ დილით ჩანიშნულა. ცხადია, ეს არის ძალიან ცუდი.

ორშაბათს სხდომა რომც არ ჩატარდეს, უკვე იმის გაცხადება, რომ სხდომა ორშაბათსაა ჩანიშნული, ნიშნავს იმას, რომ მათთვის შესაძლოა, ფორმალური პროცესი იყოს საერთოდ, რას იტყვის ვენეციის კომისია, ან შესაძლოა, ჰქონდეთ ისეთი განცდა, რომ ვენეციის კომისია იტყვის იმას, რაც მათთვის ნებისმიერ შემთხვევაში მისაღები იქნება.

აქ, მთავარია ის, რომ ასეთი მნიშვნელობის მქონე საკითხისადმი ამ ტიპის დამოკიდებულება აჩენს, თუ რამდენმად გულისყურით უდგება მმართველი პარტია სასამართლოს საკითხებზე მსჯელობას, რამდენად მნიშვნელოვანია საზოგადოებრივი აზრი, რამდენად მნიშვნელოვანია სამოქალაქო სექტორის აზრი და ზოგადად, დამოუკიდებელი მართლმსაჯულება.

რამდენიმე კვირის წინ ვნახეთ, მმართველი პარტიის თავმჯდომარის, ბიძინა ივანიშვილის ინტერვიუ, რომელმაც პრაქტიკულად, ერთ-ერთი მოსამართლე, ვინც რეალურად შემოქმედი იყო წინა ხელისუფლების დროს უსამართლო სასამართლო სისტემის, მსხვერპლად გამოიყვანა. ვფიქრობ, ამ ტიპის პროცესების ფორსირებას, ალბათ, ესეც გარკვეულწილად ხელს უწყობს“, - განაცხადა სულხან სალაძემ.