ვიცე-მერი აუდიტის სამსახურის დასკვნის საპასუხოდ -  მერის მოადგილეებისა და  თანამდებობის სხვა პირების ანაზღაურება არ გაზრდილა - პირიქით, შემცირებულია

ის ანაზღაურება, რომელსაც მერის მოადგილეები და თანამდებობის სხვა პირები იღებდნენ, არ გაზრდილა - პირიქით, შემცირებულია, - ამის შესახებ თბილისის ვიცე-მერმა ირაკლი ხმალაძემ განაცხადა. ვიცე-მერი სახელმწიფო აუდიტის სამსახურის მიერ მუნიციპალიტეტებში ჩატარებული აუდიტების შემაჯამებელი ანგარიშის შედეგებს ეხმიანება.

ირაკლი ხმალაძე აცხადებს, რომ პარლამენტმა აღნიშნულ საკითხზე უკვე იმსჯელა და საჯარო სამსახურში ანაზღაურების რეფორმა განახორციელა, რომლის შედეგადაც, 2018 წლის პირველი იანვრიდან საჯარო სამსახურში ანაზღაურების ფორმა შეიცვალა.

„2018 წლის პირველ იანვრამდე საჯარო სამსახურში ანაზღაურება, მათ შორის, თანამდებობის პირების - ვიცე-მერებისა და მოადგილეების, თანამდებობრივი სარგოს, პრემიისა და დანამატებისგან შედგებოდა. პრემია-დანამატებს სისტემური ხასიათი ჰქონდა, ანუ ყოველთვიურად გაიცემოდა, რაც სრულიად უსისტემო და არასწორი იყო. შეუძლებელია, ყოველთვიურად თანამშრომელი პრემია-დანამატს იღებდეს. მით უფრო, მერის მოადგილე და ვიცე-მერი. პარლამენტმა მიიღო კანონი, რომელიც ძალაში 2018 წლის პირველი იანვრიდან შევიდა და ყველაფერს თავისი სახელი დაერქვა. ის, რასაც მუდმივად იღებს თანამშრომელი, თანამდებობრივი სარგოა, ხოლო პრემია და დანამატი უნდა გამოიწეროს განსაკუთრებული შრომისთვის, ან ზეგანაკვეთური ნამუშევარი საათების მიხედვით“, - განაცხადა ირაკლი ხმალაძემ.

მისივე თქმით, ის ანაზღაურება, რომელსაც მერის მოადგილეები, ვიცე-მერი, ისევე როგორც მინისტრის მოადგილეები, მინისტრები და თანამდებობის სხვა პირები ხელფასის, დანამატისა და პრემიის სახით მუდმივად, სისტემატურად იღებდნენ, ხელფასში გაერთიანდა და მათზე პრემია-დანამატის გაცემა აიკრძალა. შესაბამისად, აღნიშნული თანამდებობის პირების ანაზღაურება, არ გაზრდილა.

„თუ შევადარებთ, რა თანხები ერიცხებოდა მერის მოადგილესა და ვიცე-მერს წინა წლებში და რა თანხები ერიცხებათ ახლა, ანაზღაურება პირიქით, შემცირებულია. საუბარია იმაზე, რომ რამდენიმე კატეგორია გაერთიანდა ერთ კატეგორიაში. ეს არის თანამდებობრივი სარგო. მერის პირველ მოადგილესა და მერის მოადგილეზე დანამატისა და პრემიის გაცემა საერთოდ აიკრძალა, ისევე, როგორც მინისტრის მოადგილესა და მინისტრზე და, რა თქმა უნდა, მერზე. ანაზღაურების რაოდენობის თვალსაზრისით, ადგილი აქვს თანხების შემცირებას 2011-2013 წლებთან შედარებითაც კი. პარლამენტს რომ მოუწოდებენ იმსჯელოს, საკანონმდებლო ორგანომ აღნიშნულ საკითხზე უკვე იმსჯელა და ეს რეფორმა განახორციელა. ამის შედეგია ეს ყველაფერი“, - განაცხადა ხმალაძემ.

სახელმწიფო აუდიტის სამსახურის მიერ მუნიციპალიტეტებში ჩატარებული აუდიტების შემაჯამებელი ანგარიშის მიხედვით, გასულ წელს თბილისის მერის პირველი მოადგილის ანაზღაურება 113.6%-ით, ხოლო მერის მოადგილის 119.6%-ით გაიზარდა.

თბილისის მერიის საფინანსო სამსახურის ინფორმაციით, გასულ წელს დედაქალაქის ვიცე-მერის წლიური თანამდებობრივი სარგო 75 600 ლარს, ხოლო მერის მოადგილეების ანაზღაურება 73 800 ლარს შეადგენდა. 2013-2016 წლებში კი მერის მოადგილეების წლიური თანამდებობრივი სარგო 89 243-დან 101 336 ლარის ფარგლებში მერყეობდა.

ხათუნა ლაგაზიძე -  პარლამენტში მიმდინარე პროცესები იმის ტესტიც არის, თუ რად უღირს თანამედროვე დასავლურ პოლიტიკურ ელიტას საქართველო
ქართული პრესის მიმოხილვა 14.11.2019
მაია ბითაძე - ევროპამ 50 წლით გაგვისწრო, მაგრამ ნაბიჯ-ნაბიჯ ჩვენც მივყვებით
Konica Minolta-ს პირველი ოფისი 12 ნოემბერს თბილისში ოფიციალურად გაიხსნა
ტოიოტა ფორტუნერი - თავდაჯერებულობა ნებისმიერ გზაზე, ახლა უკვე დიზელის ძრავით
აგრესიული რეგულაციების გვერდითი მოვლენები სამშენებლო ბაზარზე – ფასების ზრდა
Volvo Art Night - ვოლვო საქართველო გლობალური მიზნების კვალდაკვალ (R)
Trade In! გადაცვალე ძველი ტექნიკა ახალში  - „ელიტ ელექტრონიქსის ახალი წამოწყება“
აღმოსავლეთ ევროპის უნივერსიტეტში საერთაშორისო სამეცნიერო ვორკშოპი - "საშიში ტრანსნაციონალური დანაშაულები და მასთან ბრძოლის ნაციონალური და ინტერნაციონალური სამართლებრივი გზები და საშუალებები” ჩატარდა