ვენეციის კომისიის დასკვნის შემდგომ ვფიქრობ, მოიხსნება ის კითხვები, რომელიც ოპონენტებისგან ისმის, - ამის შესახებ პარლამენტის თავმჯდომარე ირაკლი კობახიძემ ჟურნალისტებს განუცხადა. „ინტერპრესნიუსის" კითხვის პასუხად, ირაკლი კობახიძემ აღნიშნა, რომ მმართველ გუნდში, ვენეციის კომისიის დასკვნასთან მიმართებით პოზიტიური მოლოდინებია, ვინაიდან მათ მიერ ინიცირებული კანონპროექტი 100-ჯერ აღემატება იმ მინიმალურ სტანდარტებს, რომელიც კომისიას აქვს საკითხთან მიმართებით.

„ვენეციის კომისიის დასკვნასთან დაკავშირებით მოლოდინი არის ძალიან პოზიტიური და ოპტიმისტური. ვენეციის კომისია წარმოადგენს თავის ექსპერტულ დასკვნას კანონპროექტთან დაკავშირებით. მარტივად რომ ავიღოთ, რომ ეწეროს იუსტიციის საბჭო წარმოადგენს სიას, რაც იყო მანამდე და ამტკიცებს პარლამენტი, ეს ყველაფერი სამართლის პრინციპებთან თავსებადია, რადგან ბევრ ქვეყანაშია ასე“, - აღნიშნა ირაკლი კობახიძემ.

პარლამენტის თავმჯდომარე ოპოზიციის ბრალდებებსაც პასუხობს, რომლის თანახმად მმართველი გუნდი კანონპროექტს დაჩქარებულად, ვენეციის კომისიის დასკვნამდე მიზანმიმართულად განიხილავს, რაც კითხვებს აჩენს. პარლამენტის თავმჯდომარის განცხადებით, ვადებთან დაკავშირებით, ვენეციის კომისია სრულად ინფორმირებულია. რაც შეეხება კომისიის დასკვნას, რომელიც მოსამარათლეთა უვადოდ განწესებასა და კანდიდატთა შესარჩევ კრიტერიუმებს შეეხება, ხვალ გამოქვეყნდება.