ICAO-ს მუდმივმოქმედი ჯგუფის ხელმძღვანელად საქაერონავიგაციის თანამშრომელი აირჩიეს

საქართველოს ეკონომიკისა და მდგრადი განვითარების სამინისტროს შპს "საქაერონავიგაციის" საჰაერო სივრცის ორგანიზების განყოფილების უფროსი - ევგენი თავაძე ICAO-ს ევროპისა და ჩრდილო-ატლანტიკური რეგიონის ოფისის საჰაერო მარშრუტების განვითარების მუდმივმოქმედი ჯგუფის თავმჯდომარედ 4 წლის ვადით აირჩიეს.

როგორც „ინტერპრესნიუსს“ საქართველოს ეკონომიკისა და მდგრადი განვითარების სამინსიტროდან აცნობეს, ICAO-ს საჰაერო მარშრუტების განვითარების ჯგუფის რიგით 30-ე შეხვედრა ქალაქ ტალინში, აპრილში გაიმართა. შეხვედრაზე შავი ზღვის აუზის და ახლო აღმოსავლეთის რეგიონების ქვეყნების საჰაერო ნაკადების მიმართულებების ოპტიმიზაციის და საჰაერო მარშრუტების განვითარების შესაძლებლობები განიხილეს, განისაზღვრა შესაბამისი სამოქმედო გეგმებიც.

“დარწმუნებული ვარ, ევგენი თავაძის მუშაობა ნაყოფიერი იქნება და ის დადებით წვლილს შეიტანს სამოქმედო გეგმით განსაზღვრული აქტივობების განხორციელებაში. მინდა წარმატება ვუსურვო მას და მუდმივმოქმედ ჯგუფს საჰაერო მარშრუტების ქსელების განვითარების და საჰაერო ნაკადების რეგიონალური ჰარმონიზაციის უზრუნველყოფის საქმეში”, - განაცხადა შპს “საქაერონავიგაციის” გენერალურმა დირექტორმა გოჩა მეზვრიშვილმა.

ICAO-ს თავისუფალი საჰაერო მარშრუტების განვითარების ჯგუფი 2004 წელს შეიქმნა და წელიწადში ორჯერ იკრიბება. ჯგუფის მისია საჰაერო მარშრუტების ოპტიმიზაციის კონცეფციის შემუშავება და მისი იმპლემენტაციაა. აღნიშნული კონცეფცია გულისხმობს, იმ ტიპის საჰაერო სივრცის შექმნას, რომლის გამოყენების დროსაც ავიაკომპანიებს ექნებათ შესაძლებლობა, ფრენის მარშრუტის დადგენისას უმოკლესი მანძილი აირჩიონ და შეძლონ შემოსვლის და გასვლის უმოკლეს წერტილებს შორის რეისის ისე დაგეგმვა, რომ არ დაჭირდეთ საჰაერო მოძრაობის მართვის ცენტრთან წინასწარი შეთანხმება და კონკრეტული საჰაერო მარშრუტის მითითება. მოკლე საჰაერო მანძილი კი თავის მხრივ გულისხმობს ფრენის დროს, საოპერაციო ხარჯების და ეკოლოგიაზე ნეგატიური ზემოქმედების შემცირებას.

მამუკა ხაზარაძე - ცვლილებების დროა! ხელისუფლება, რომელიც ემსახურება რუსეთს, უნდა დასრულდეს! „ლელო“ ემსახურება საქართველოს!
ემილ ავდალიანი - არაბული ქვეყნებისთვის და ირანისთვის ახლო აღმოსავლეთის რეგიონთან ჩინეთის ურთიერთობის სუფთა წარსული მეტად მიმზიდველია
ქართული პრესის მიმოხილვა 28.03.2024
საქართველოს თავდაცვის დილემა - რთული არჩევანი რთულ ვითარებაში
ამერიკული სამედიცინო ჰოლდინგი - CooperSurgical-ი საქართველოში ოვამედის ორგანიზებით სამდღიან სემინარს მართავს