ისრაელ-პალესტინის კონფლიქტის გადაჭრის დონალდ ტრამპისეული გეგმა არ შეიცავს დამოუკიდებელი პალესტინის სახელმწიფოს შექმნის მოთხოვნას. ამის შესახებ ინფორმაციას ამერიკული გამოცემა Washington Post წყაროებზე დაყრდნობით ავრცელებს.
წყაროს ინფორმაციით, ე.წ. „საუკუნის გარიგება“ პალესტინელებისთვის ავტონომიის შექმნას ითვალისწინებს.
შეგახსენებთ, რომ აღნიშნული გეგმის შემუშავებას აშშ-ს პრეზიდენტის სიძე და უფროსი მრჩეველი ჯარედ კუშნერი კურირებს. ჯარედ კუშნერთან დაახლოებული წყაროების ინფორმაციით, აშშ-ს პრეზიდენტის პროგრამა სამშვიდობო დარეგულირებასა და პალესტინის ავტონომიის ეკონომიკურ განვითარებას არაბული სახელმწიფოების მიერ ისრაელის აღიარებას დაუკავშირებს.
Washington Post ასევე წერს, რომ ტრამპის ეს გეგმა მიმდინარე წლის ივნისის დასაწყისში იქნება გამოქვეყნებული. ამავდროულად, ევროკავშირში აცხადებენ, რომ აღნიშნული გეგმა ცალმხრივია და პალესტინელების ინტერესებს უგულებელყოფს.