აი, ეს იუსტიციის საბჭო, ანუ ვინც ტესტებს ყიდის და ამ გამოცდებს ატარებს, რითი დგას ადვოკატთა ასოციაციაზე მაღლა? - ამ კითხვით „თავისუფალი დემოკრატების“ წევრმა ლევან სამუშიამ უმრავლესობის წევრებს იურიდიულ საკითხთა კომიტეტის სხდომაზე მიმართა, სადაც უზენაეს სასამართლოში მოსამართლეთა შერჩევასთან დაკავშირებულ კანონპროექტს მეორე მოსმენით განიხილავენ.
სამუშიას თქმით, სამართლის სფეროში ბევრია ისეთი ადამიანი, რომელიც მოსამართლეთა საკვალიფიკაციო გამოცდას განზრახ არ აბარებს, რადგან არ ენდობა ისუტიციის უმაღლეს საბჭოს, ტესტების სკანდალის შემდეგ.
„ჩვენ თუ იმაზე ვთანხმდებით, რომ ტესტებით ვაჭრობა მოხდა, ანუ ტესტები გაიყიდა, აი, ეს იუსტიციის საბჭო, ანუ ვინც ტესტებს ყიდის და ამ გამოცდებს ატარებს, რითი დგას ადვოკატთა ასოციაციაზე მაღლა? მე ვიცი ბევრი ადამიანი, რომელიც სპეციალურად არ მიდის იუსტიციის საბჭოში მოსამართლეთა გამოცდის ჩასაბარებლად, ამ ტესტების სკანდალის შემდეგ. როდესაც არაკეთილსინდისიერად მოქმედებენ იქ, არავის აქვს იმედი, რომ მათი ცოდნა დაფასებული იქნება. მე მინდა გკითხოთ, გეპარებათ თუ არა ეჭვი იუსტიციის საბჭოს კეთილსინდისიერებაში და ამ მოსამართლეების გამოცდებთან დაკავშირებით?“, - მიმართა სამუშიამ უმრავლესობას.