იურიდიულ საკითხთა კომიტეტმა ხანგრძლივი განხილვისა და დისკუსიის შემდეგ, უზენაესი სასამართლოს მოსამართლეების არჩევის წესთან დაკავშირებით უმრავლესობის საკანონმდებლო პაკეტს მხარი დაუჭირა.

9 მომხრე, 1 წინააღმდეგი - ასეთი იყო „საერთო სასამართლოების შესახებ კანონპროექტზე“ კენჭისყრის შედეგი. კენჭისყრის დასრულების შემდეგ კომიტეტის თავმჯდომარემ ანრი ოხანაშვილმა კიდევ ერთხელ აღნიშნა, რომ პარლამენტის მიერ კენჭისყრაზე გადაწყვეტილების მიღებამდე ვენეციის კომისიის დასკვნას აუცილებლად განიხილავენ. დასკვნას კი ხვალისთვის ელოდებიან.

საკანონმდებლო პაკეტზე კრიტიკული შენიშვნები ჰქონდათ იურისტებს, არასამთავრობო ორგანიზაციების წარმომადგენლებს და სახალხო დამცველის აპარატს. განხილვისას შენიშვნები გამოითქვა უზენაესი სასამართლოს მოსამართლეობის კანდიდატთა შერჩევის კრიტერიუმებზე, ასევე კენჭისყრის ფარულობასა და იუსტიციის უმაღლესი საბჭოს წევრების მხრიდან ინტერესთა კონფლიქტის საფრთხეზე.