პარლამენტი დაჩქარებული წესით რეგლამენტში დაგეგმილ ცვლილებებზე მსჯელობს, რომელიც ნდობის ჯგუფის განახლებული წესით დაკომპლექტებას ითვალისწინებს.

პროექტის მიხედვით, პარლამენტში უმცირესობის არარსებობის შემთხვევაში, უმრავლესობის გარეთ დარჩენილი წევრები უფლებამოსილი იქნებიან, ნდობის ჯგუფში წარადგინონ უმრავლესობის გარეთ დარჩენილ პარლამენტის წევრთაგან მეტი მხარდაჭერის მქონე 2 პარლამენტის წევრი.

ამასთან, ნდობის ჯგუფში წარდგენის უფლებამოსილების მქონე სუბიექტებს უფლება ექნებათ, ნდობის ჯგუფში წარდგენილ შესაბამის წევრზე უფრო მეტი მხარდაჭერის მქონე ახალი კანდიდატურა წარადგინონ. მეტი მხარდაჭერის პრინციპი უმრავლესობისა და უმცირესობის მიერ წარდგენილ ახალ კანდიდატურაზე არ გავრცელდება.

როგორც პლენარულ სხდომაზე თავდაცვისა და უშიშროების კომიტეტის თავმჯდომარემ ირაკლი სესიაშვილმა განმარტა, რეგლამენტის 157-ე მუხლით დადგენილი წესით, ნდობის ჯგუფის ფორმირებისას პრაქტიკაში ხარვეზები გამოიკვეთა, რის გამოც დღეისათვის ნდობის ჯგუფის სრული შემადგენლობით დაკომპლექტება ვერ ხორციელდება.

ცნობისთვის, პარლამენტის ნდობის ჯგუფი, რომელიც მოქმედი კანონით ხუთი წევრისგან უნდა შედგებოდეს, სადღეისოდ მხოლოდ ორი წევრით არის წარმოდგენილი - ესენია ირაკლი სესიაშვილი და მაჟორიტარ დეპუტატთა კვოტით წარდგენილი არჩილ თალაკვაძე. უმრავლესობის შემადგენლობიდან გასვლის გამო ნდობის ჯგუფის წევრობა დაკარგა ეკა ბესელიამ და ასევე, ირაკლი აბესაძემ, რომელიც ნდობის ჯგუფში უმცირესობას წარმოადგენდა, მაგრამ თავად საპარლამენტო უმცირესობა დაიშალა. ამასთან, ნდობის ჯგუფში დღემდე ვაკანტურად რჩება უმრავლესობისა და უმცირესობის გარეთ დარჩენილი პარლამენტის წევრისთვის განკუთვნილი კვოტა, რადგან დეპუტატთა ეს ჯგუფი საერთო კანდიდატზე ვერ შეთანხმდა.