პარლამენტი მუშაობას აგრძელებს იმ ინიციატივებზე, რომლებიც ბავშვთა უფლებების დაცვასა და მდგომარეობის გაუმჯობესებას ემსახურება, - ამის შესახებ „ინტერპრესნიუსს“ საქართველოს პარლამენტიდან აცნობეს. ამ თემაზე საქართველოს პარლამენტის თავმჯდომარემ ირაკლი კობახიძემ, ევროპისა და ცენტრალური აზიის ქვეყნებში გაეროს ბავშვთა ფონდის (UNICEF) რეგიონულმა დირექტორმა აფშან ხანმა და გაეროს ბავშვთა ფონდის წარმომადგენელმა საქართველოში ღასან ხალილმა დღეს გამართულ შეხვედრაზე იმსჯელეს.

პარლამენტის თავმჯდომარემ განაცხადა, რომ ადამიანის უფლებების და განსაკუთრებით, ბავშვთა უფლებების დაცვა ხელისუფლების ერთ-ერთი უმთავრესი პრიორიტეტია. მისივე განმარტებით, ამას ემსახურება გასულ წელს დაწყებული სპეციალური სოციალური დახმარების პროგრამა ბავშვებისთვის, აგრეთვე, უახლოეს წლებში განათლების სფეროსთვის გამოყოფილი გაზრდილი დაფინანსების მნიშვნელოვანი ნაწილის მიმართვა სკოლამდელ განათლებაზე.

პარლამენტის პრესსამსახურის ინფორმაცით, აფშან ხანმა ირაკლი კობახიძეს „ბავშვის უფლებათა კოდექსის“ შემუშავების საკითხში საპარლამენტო საქმიანობისთვის მადლობა გადაუხადა. ამასთან, მან დაადასტურა ბავშვთა უფლებების გაუმჯობესების პროცესში ქართულ მხარესთან მჭიდრო თანამშრომლობის მზადყოფნა.