ვენეციის კომისიისგან ეს რეკომენდაციები მოსალოდნელი იყო და ასევე მოსალოდნელი იყო პარლამენტის თავმჯდომარის სამოსნური ახსნა-განმარტებები, - ამის შესახებ იუსტიციის უმაღლესი საბჭოს არამოსამართლე წევრმა ანა დოლიძემ ჟურნალისტებს პარლამენტში, ირაკლი კობახიძის დიპლომატიურ კორპუსთან, არასამთავრობო ორგანიზაციების და ხელისუფლების სამივე შტოს წარმომადგენლებთან შეხვედრის დაწყებამდე განუცხადა.

მისი შეფასებით, ვენეციის კომისიამ წარადგინა უმნიშვნელოვანესი რეკომენდაციები ყველა მიმართულებით.

„ეს მოსალოდნელიც იყო და ასევე მოსალოდნელი იყო პარლამენტის თავმჯდომარის სამოსნური ახსნა-განმარტებები: სკოლაში რომ იცოდნენ ხოლმე, რვეული სახლში დამრჩა და ბებიასთან დავრჩი და ამიტომ დავალება ვერ გავაკეთე, მსგავისი ტიპის თავის გამართლებები, რატომ არ დანერგავს ვენეციის კომისიის რეკომენდაციებს. იმიტომ არ დანერგავს, რომ ასეთ შემთხვევაში უბრალოდ მოუწევს „კლანს“ ნელ-ნელა მოიცადოს, სანამ დააკომპლექტებს უზენაეს სასამართლოს. დღეს მოვედით აქ, რომ ვაჩვენოთ და დავადასტუროთ, რამდენად აპირებს ვენეციის კომისიის პოზიციის გაზიარებას პარლამენტის თავმჯდომარე თუ მსგავსი ტიპის შეხვედრები არის უბრალოდ კეკლუცობა ჩვენი უცხოელი პარტნიორების წინაშე - ეს გაირკვევა ამ შეხვედრის დროს“, - განაცხადა ანა დოლიძემ.