უამრავი ცვლილების ნაცვლად, ირაკლი კობახიძე აპირებს, რომ ერთი ან ორი რეკომენდაცია გაითვალისწინოს, ეს პროცესს დემოკრატიულობას ვერ შესძენს, - ამის შესახებ იუსტიციის უმაღლესი საბჭოს არამოსამართლე წევრმა, ანა დოლიძემ პარლამენტის თავმჯდომარესთან გამართული შეხვედრის დასრულების შემდეგ განუცხადა.

მისი თქმით, პარლამენტის თავმჯდომარეს ვენეციის კომისიის მიმართ აქვს ფორმალური დამოკიდებულება.

„მოსალოდნელი იყო, რომ პარლამენტის თავმჯდომარეს ექნებოდა ფორმალური დამოკიდებულება ასეთი ავტორიტეტული საერთაშორისო ორგანოს მიმართ. უამრავი ცვლილების ნაცვლად, კობახიძე აპირებს, რომ გაითვალისწინოს ერთი ან ორი ცვლილება და ეს რა თქმა უნდა, დემოკრატიულობას ვერ შესძენს პროცესს, რომელიც წარიმართება. ეს მოიტანს ძალიან ცუდ შედეგს და უდიდეს რეპუტაციულ დარტყმას. ვენეციის კომისია არის ჩვენი პარტნიორი და მის მიმართ ასეთი უდიერი დამოკიდებულება, ჯერ დაჩქარება და მერე მისი რეკომენდაციების გადაგდება გვერდზე, მოიტანს მძიმე რეპუტაციულ დარტყმას ჩვენი სახელმწიფოსთვის“, - განაცხადა ანა დოლიძემ.