აბიტურიენტების კითხვებს შეფასებისა და გამოცდების ეროვნული ცენტრის ქართული ენისა და ლიტერატურის ჯგუფის ხელმძღვანელი უპასუხებს

18 აპრილის, 13:00 საათიდან 16:00 საათამდე, ყველა აბიტურიენტს საშუალება ექნება შეფასებისა და გამოცდების ეროვნული ცენტრის Facebook-ის გვერდზე მისთვის საინტერესო კითხვაზე პასუხი უშუალოდ ქართული ენისა და ლიტერატურის ჯგუფის ხელმძღვანელის ნანა ლოლაძისაგან მიიღოს.

განათლების სამინისტროს ცნობით, საინფორმაციო კამპანიის ფარგლებში კვირაში ერთხელ, ყოველ ხუთშაბათს, ცენტრის Facebook-ის გვერდზე აბიტურიენტების დასმულ კითხვებს სხვადასხვა საგნობრივი ჯგუფის წარმომადგენლები უპასუხებენ.

პროექტის მიზანია, რომ აბიტურიენტებს კიდევ ერთი დამატებითი საშუალება მიეცეთ მათთვის მნიშვნელოვანი და საინტერესო თემების განსახილველად. აბიტურიენტებს შესაძლებლობა ექნებათ გამოცდების შინაარსობრივი ნაწილის გარდა, ყველა იმ საკითხზე მიიღონ ინფორმაცია, რომელიც საგამოცდო პროცესს უშუალოდ შეეხება. მთელი წინასაგამოცდო პერიოდის განმავლობაში გაგრძელდება ღია კარის დღეებიც.

ერთიანი ეროვნული გამოცდებისათვის რეგისტრაცია 41 ათასამდე აბიტურიენტმა გაიარა. 7 მაისის 18:00 საათამდე დარეგისტრირებულ აპლიკანტებს შეეძლებათ საგნის შეცვლა, წაშლა, დამატება ან შემოქმედებითი ტურის არჩევა. საგანმანათლებლო პროგრამების შეცვლისა და დამატების შესაძლებლობა მათ მიეცემათ აპელაციების შედეგების გამოქვეყნებიდან მომდევნო დღის ჩათვლით.