საქართველოს საგარეო საქმეთა მინისტრი იორდანიის ჰაშიმიტური სამეფოს სენატის პრეზიდენტს შეხვდა

საქართველოს საგარეო საქმეთა მინისტრმა დავით ზალკალიანმა იორდანიის ჰაშიმიტური სამეფოს სენატის პრეზიდენტი ფეისალ ალ-ფაიეზი მიიღო.

საქართველოს საგარეო საქმეთა სამინისტროს ინფორმაციით, ქართული მხარე მიესალმა იორდანიის საპარლამენტო დელეგაციის ვიზიტს საქართველოში და აღნიშნა, რომ ორმხრივი მაღალი დონის ვიზიტები ხელს უწყობს ორ ქვეყანას შორის ბოლო დროს განვითარებულ ურთიერთობათა დადებითი დინამიკის შენარჩუნებასა და გაღრმავებას.

მათივე ცნობით, შეხვედრაზე მხარეებმა განიხილეს ორმხრივი ურთიერთობების დღის წესრიგში არსებული აქტუალური საკითხები და თანამშრომლობის შემდგომი გაღრმავების პერსპექტივები. განსაკუთრებული ყურადღება დაეთმო ქვეყნებს შორის პოლიტიკური და ეკონომიკური კავშირების განმტკიცების მნიშვნელობას.

მხარეებმა ასევე განიხილეს ჩვენს რეგიონში, ახლო აღმოსავლეთსა და მსოფლიოში არსებული უსაფრთხოების გამოწვევები, რომლებიც გავლენას ახდენენ მსოფლიო უსაფრთხოების გარემოზე.

იორდანულმა მხარემ კიდევ ერთხელ დაადასტურა იორდანიის ჰაშიმიტური სამეფოს მტკიცე მხარდაჭერა საქართველოს ტერიტორიული მთლიანობის მიმართ, მის საერთაშორისოდ აღიარებულ საზღვრებში.

იორდანიის სენატის დელეგაცია ოთხდღიანი ვიზიტით სტუმრობს საქართველოს. აღსანიშნავია, რომ ეს არის იორდანიიდან მსგავსი მაღალი დონის დელეგაციის საქართველოში ჩამოსვლის პირველი შემთხვევა და წარმოადგენს ისტორიულ შესაძლებლობას ორ ქვეყანას შორის კეთილმეგობრული პარტნიორობის გასაღრმავებლად.