საქართველოს განათლების, მეცნიერების, კულტურისა და სპორტის მინისტრი, მიხეილ ბატიაშვილი აშშ-ში, სან-ფრანცისკოში მცხოვრებ ქართული დიასპორის წარმომადგენლებსა და სტუდენტებს განათლების სფეროში მიმდინარე რეფორმების, პროგრამებისა და სხვადასხვა მნიშვნელოვანი საკითხის შესახებ ესაუბრა. ამის შესახებ „ინტერპრესნიუსს“ განათლების, მეცნიერების, კულტურისა და სპორტის სამინისტროდან აცნობეს.
მათი ინფორმაციით, მიხეილ ბატიაშვილმა სამინისტროს პროექტი - „ქართული ენის დისტანციური სკოლა“ გააცნო, რაც უცხოეთში მცხოვრები ქართველი მოსწავლეებისათვის სინქრონული ონლაინ-გაკვეთილების ჩატარებას გულისხმობს.
სამინისტროს ცნობით, შეხვედრაზე ასევე ისაუბრეს სამინისტროში შექმნილ საერთაშორისო თანამშრომლობისა და დიასპორასთან ურთიერთობის სამმართველოზე, რომელიც უზრუნველყოფს როგორც საზღვარგარეთ მცხოვრებ ქართულ დიასპორასთან ურთიერთობის გაძლიერებას, ასევე უცხოეთში საქართველოს საელჩოებსა და საქართველოში აკრედიტებულ დიპლომატიურ წარმომადგენლობებთან თანამშრომლობას.