ყველაზე სამწუხარო ამ პროცესში არის ის, რომ ამ ქვეყანაში მინისტრის ცვლილებასაც კი არანაირი რეალური ცვლილების მოლოდინი არ მოსდევს,-ამის შესახებ " ევროპული საქართველოს" წევრმა ირაკლი აბესაძემ გიორგი ქობულიას მიერ ეკონომიკის მინისტრის თანამდებობის დატოვების კომენტირებისას განაცხადა.

აბესაძის თქმით, მინისტრის ცვლილებით ცვლილებები პოლიტიკაში არ იქნება და ქვეყნის მართვა ივანიშვილის მითითებებით გაგრძელდება.

"შეუძლებელია ვისაუბროთ, სიტუაციის დამძიმებაზე, ან გაუმჯობესებაზე განსაკუთრებით ისეთ უმძიმეს მდგომარეობაში არსებულ სფეროზე - ეკონომიკაში. ეს განპირობებულია იმ მართვის სტილით , რაც პირდაპირ ივანიშვილის ნებასურვილის გატარებას უკავშირდება ყველა სფეროში. ასე, რომ, არანაირი არსებითი ცვლილება პოლიტიკაში არ იქნება, ქვეყნის მართვა კვლავ გაგრძელდება ივანიშვილის ახირებების შესაბამისად. ვერც სიღარიბის დაძლევაზე ვისაუბრებთ და ვერც ეკონომიკური ზრდის დაჩქარებაზე , რაც ასე ძალიან აინტერესებს მოსახლეობას",-განაცხადა ირაკლი აბესაძემ.