ჭავჭავაძის გამზირზე, მშენებლობაზე ორი ადამიანის გარდაცვალების საქმეზე, შპს „ხიმინჯ სერვის 2”-ის დაკავებულ დირექტორს, ოთარ ცნობილაძეს თბილისის საქალაქო სასამართლომ აღკვეთის ღონისძიების სახით პატიმრობა შეუფარდა.
ბრალდებულის ადვოკატმა, გიორგი ყიფშიძემ სასამართლოში ცნობილაძის 10 000-ლარიანი გირაოს სანაცვლოდ გათავისუფლების შუამდგომლობა დააყენა, რაც მოსამართლემ არ დააკმაყოფილა. ადვოკატი მიიჩნევს, რომ ოთარ ცნობილაძის პატიმრობის საფუძველი არ არსებობდა. როგორც ის ამბობს, უსაფრთხოების ნორმების დაცვაზე ცნობილაძესთან ერთად სხვა ადამიანებსაც უნდა ეზრუნათ.
ცნობისთვის, 31 მარტს ჭავჭავაძის 5 ნომერში მიწა ჩამოიშალა და 2 მუშა მოიყოლა. აღნიშნულთან დაკავშირებით, თბილისის პოლიციის დეპარტამენტის ვაკე-საბურთალოს სამმართველოს თანამშრომლებმა, ჩატარებული ოპერატიულ-საგამოძიებო ღონისძიებების შედეგად, შპს "ხიმიჯ სერვის 2"-ის დირექტორი - 1957 წელს დაბადებული ო.ც. სამთო, სამშენებლო ან სხვა სამუშაოს წარმოებისას უსაფრთხოების წესის დარღვევას ბრალდებით, მოსამართლის განჩინების საფუძველზე დააკავეს.
გამოძიება საქართველოს სისხლის სამართლის კოდექსის 240-ე მუხლით მიმდინარეობს.