ნატოს მხარდაჭერა უკრაინასა და საქართველოსადმი, მნიშვნელოვანი ელემენტია შავ ზღვაში უსაფრთხოების გასაძლიერებლად. ამის შესახებ ნატოში ამერიკის ელჩმა ქეი ბეილი ჰათჩისონმა „ტვიტერის“ პირად გვერდზე დაწერა.

„ამ თვის დასაწყისში ნატოს მოკავშირეები შეთანხმდნენ ჩვენი უსაფრთხოების გაძლიერებაზე შავი ზღვის რეგიონში. ცნობიერების ამაღლება, წვრთნა და სწავლება, პორტებში ვიზიტი და ნატოს პარტნიორების პრაქტიკული მხარდაჭერა უკრაინისა და საქართველოსადმი ამ ძალისხმევის მნიშვნელოვანი შემადგენელი ნაწილია“, - წერს ჰათჩისონი.

როგორც ცნობილია, ამერიკული რაკეტმზიდი „USS Ross“ 14 აპრილს საღამოს შავი ზღვის აკვატორიაში შევიდა. 5-დან 13 აპრილამდე კი შავ ზღვაში ნატოს მრავალეროვნული მასშტაბური წვრთნები გაიმართა „საზღვაო ფარი 2019“.

4 აპრილს ნატოს წევრმა ქვეყნებმა შეათანხმეს შავი ზღვის რეგიონში უსაფრთხოების გაძლიერების ზომები რუსეთის მხრიდან აგრესიული ქმედებების გამო.