აზერბაიჯანელი ჟურნალისტის, აფგან მუხთარლის მეუღლის, ლეილა მუსტაფაევას ინფორმაციით, ბაქოს ციხეში მოთავსებული მუხთარლის ჯანმრთელობის მდგომარეობა გაუარესდა. ამის შესახებ მუსტაფაევა სოციალურ ქსელში წერს.
„აფგან მუხთარლის ჯანმრთელობის მდგომარეობა გაუარესდა. დაეწყო თვალების ძლიერი ტკივილები და ურინარიული სისტემის გართულებები. სტანჯავს მაღალი არტერიური წნევა და მე-2 ტიპის დიაბეტი. ციხის ექიმებს ჯერჯერობით არ შეუმოწმებიათ“, - წერს ლეილა მუსტაფაევა.
შეგახსენებთ, რომ აზერბაიჯანელი ოპოზიციონერი ჟურნალისტი აფგან მუხთარლი თბილისში გასული წლის 29 მაისს გაუჩინარდა. მოგვიანებით აღმოჩნდა, რომ ის აზერბაიჯანში იმყოფება. აფგან მუხთარლის ბრალი სამი მუხლით - აზერბაიჯანის სახელმწიფო საზღვრის უკანონოდ გადაკვეთის, კონტრაბანდის და ხელისუფლების წარმომადგენლისთვის წინააღმდეგობის გაწევის ან ძალადობის მუხლებით ჰქონდა წაყენებული.
2018 წლის 12 იანვარს აზერბაიჯანულმა სასამართლომ აფგან მუხთარლის 6 წლით თავისუფლების აღკვეთა მიუსაჯა.