რამ შეგაშინათ ბატონო ვანო? - ამ კითხვით მიმართა „ევროპული საქართველოს" წევრმა ზურაბ ჭიაბერაშვილმა ფინანსთა მინისტრ ივანე მაჭავარიანს პარლამენტის საფინანსო-საბიუჯეტო კომიტეტის სხდომაზე.
როგორც ჭიაბერაშვილი განმარტავს, ესაა ეროვნული ბანკის პრეზიდენტის კობა გვენეტაძის ციტატა, „რომელმაც ვერ გაიგო, რამ შეაშინა ფინანსთა მინისტრი საბანკო რეგულაციებთან დაკავშირებით“.
ამასთან, ზურაბ ჭაბერაშვილი ივანე მაჭავარიანს მის მიერ წარმოთქმულ ციტატებსაც ახსენებს და ამბობს, რომ მინისტრის განცხადებებს შორის რადიკალურ ცვლილებებს ხედავს.
„მინდა წაგიკითხოთ თქვენი ორი ციტატა, იმიტომ, რომ რადიკალური ცვლილება დავინახე თქვენს მიდგომაში თებერვლიდან აპრილამდე. თქვენ 13 თებერვალს განაცხადეთ, რომ საბანკო რეგულაციების ნაწილში დრამატულ სურათს ვერ ხედავთ, 4 აპრილს ამბობთ - ამ მასშტაბის რეგულაციების მომხრე არც მაშინ ვიყავი და ახლა ვარ, იმედია ეროვნული ბანკი საკუთარ თავში იპოვის ძალას და გადახედავს რეგულაციებს. ანუ თებერვალში რაიმე დრამატულს ვერ ხედავდით, აპრილში ხედავთ და თუ ხედავთ, ჩემი კითხვაა, რის გაკეთებას აპირებთ?,“-განაცხადა ჭიაბერაშვილმა.