პარლამენტის განათლებისა და მეცნიერების კომიტეტის უახლოეს სხდომაზე ზუგდიდის მე-6 საჯარო სკოლის ყოფილი დირექტორის, ია კერზაიას შვილს ბაჩანა შენგელიას მოიწვევენ. ამავე სხდომაზე "ევროპული საქართველოს" მოთხოვნით, კომიტეტი ია კერზაიას გარდაცვალების საქმეზე თემატური მოკვლევის ჯგუფის შექმნაზე იმსჯელებს.
"ევროპულმა საქართველომ" განათლების კომიტეტზე დავაყენეთ საკითხი, რომ ია კერზაიას საქმის შესწავლა გავაგრძელოთ და მოვითხოვეთ, რომ ამ სხდომაზე მოსულიყო პროკურატურის წარმომადგენელი. ჩვენ დღეს მარიამ ჯაშისგან მივიღეთ წერილი, რომ მას მიზანშეწონილად არ მიაჩნია პროკურორის მოსვლა, რადგან გამოძიება გრძელდება, მაგრამ ის, რომ ყველა გახმაურებულ საქმეზე გამოძიება გრძელდება, ყველამ კარგად ვიცით. ამასობაში, ყველა ვადა, რომელიც პარლამენტარებმა პროკურატურას განუსაზღვრეს, უკვე ამოიწურა. ამიტომ ჩვენ დღეს შევთანხმდით, რომ უახლოეს სხდომაზე მოვიწვევთ ბაჩანა შენგელიას, მოვუსმენთ მას და შემდეგ მივიღებთ გადაწყვეტილებას იმასთან დაკავშირებით, შეიქმნას თუ არა თემატური მოკვლევის ჯგუფი ია კერზაიას საქმეზე. თუ უმრავლესობის წევრები გადაწყვეტენ, რომ არ ღირს ამ საქმის შესწავლა, ეს მათ სინდისზე იქნება, პოლიტიკურზეც და ადამიანურზეც,"- განაცხადა სერგი კაპანაძემ.