სახელმწიფო აუდიტის სამსახურმა სახანძრო უსაფრთხოების მოთხოვნების დაცვის აუდიტი ჩაატარა. აუდიტის ობიექტი იყო საგანგებო სიტუაციების მართვის სამსახური. როგორც ეფექტიანობის აუდიტის სამსახურის უფროსი აცხადებს, აუდიტმა სამი სახის დარღვევა გამოავლინა.
„პირველი მიგნება იყო, რომ სამსახურს არ ჰქონდა სრული სია შესამოწმებელი ობიექტების, მათ სიაში ობიექტების დაახლოებით 18% იყო გამორჩენილი. მეორე მიგნება შეეხებოდა უშუალოდ შემოწმების პროცესს. შემოწმების პროცესში სახანძრო ინსპექტორებს არ აქვთ განსაზღვრული მეთოდოლოგია, რომლითაც ისინი უზრუნველყოფენ თვითონ შემოწმების მაღალ ხარისხს. ხოლო მესამე მიგნება შეეხებოდა უშუალოდ მიწერილობების, ანუ შემოწმების შედეგად გაცემული რეკომენდაციების შესრულებას, საკმაოდ მაღალ პროცენტში ობიექტები საერთოდ არ არიან დაჯარიმებული, ხოლო ვინც არიან დაჯარიმებული, მათგან მხოლოდ 21% აქვს გადახდილი ჯარიმა", - განაცხადა ეფექტიანობის აუდიტის დეპარტამენტის უფროსმა გიორგი კალანდაძემ.
აუდიტის პერიოდი მოიცავდა 2016 წლიდან 2018 წლის პირველი ნახევრის პერიოდს.