მხოლოდ მისასალმებელია, როდესაც ასეთ დონეზე არის დიპლომატიური კორპუსის ჩართულობა, - ასე გამოეხმაურა საქართველოს საგარეო საქმეთა სამინისტროს წარმომადგენელი ვლადიმერ კონსტანტინიდი საქართველოში ამერიკის შეერთებული შტატების ელჩის მოვალეობის შემსრულებლის, როს უილსონის განცხადებას კანონპროექტზე, რომელიც უზენაეს სასამართლოში მოსამართლეთა შერჩევას ეხება.

მისი თქმით, სასამართლოსთან დაკავშირებულ საკითხებზე ინტენსიურად მიმდინარეობს მუშაობა და მსჯელობა.

„არსებით საკითხს, თვითონ კანონმდებლობაში რა აისახა ან უნდა ასახულიყო, ამ პოლემიკაში ჩვენ ბუნებრივია ჩვენი კომპეტენციიდან გამომდინარე ვერ შევალთ.

რასაკვირველია, მივესალმებით დიპლომატიური კორპუსის, ჩვენი ამერიკელი პარტნიორების ჩართულობას ამ საკითხებში. იცით, რომ ინტენსიურად მიმდინარეობს ამ საკითხზე მუშაობა, ბორჯომში საკითხის სპეციალური განხილვა ხდება და იქ დიპლომატიური კორპუსიც იღებს მონაწილეობას. მხოლოდ მისასალმებელია, როდესაც ასეთ დონეზე არის ჩართულობა“, - განაცხადა ვლადიმერ კონსტანტინიდიმ.

„ბოლოს მიღებულ კანონმდებლობასთან დაკავშირებით, ცოტა არ იყოს, გულდაწყვეტილები ვართ“, - ამის შესახებ აშშ-ის ელჩის მოვალეობის შემსრულებელმა როს უილსონმა სასამართლოს რეფორმასთან დაკავშირებით განაცხადა. ამერიკელი დიპლომატი წუხს, რომ კანონმდებლობაში არ მოხდა იმ რეკომენდაციების სრულად გათვალისწინება, რომელიც ქართულ მხარეს საერთაშორისო ორგანიზაციებმა მისცეს.