ვადაზე ადრე გათავისუფლების ადგილობრივი საბჭო არის პოლიტიკურად მიკერძოებული, ის ექვემდებარება პრაქტიკულად იუსტიციის მინისტრს წულუკიანს, - ასე შეაფასა „ევროპული საქართველოს" წევრმა ოთარ კახიძემ ივანე მერაბიშვილისთვის ვადაზე ადრე გათავისუფლებაზე უარის თქმა.
„მიუხედავად იმისა, რომ ამ სასამართლომაც კი გააუქმა მერაბიშვილზე გაცემული უარი და დაავალა, რომ დასაბუთებული გადაწყვეტილება გამოეცა, იუსტიციის სამინისტრო, მაინც ხელმძღვანელობს პოლიტიკური შეხედულებებით და ივანე მერაბიშვილს დაუსაბუთებლად და ყოველგვარი რეალური არგუმენტის გარეშე უხანგრძლივებს პატიმრობას. ივნისში, სტრასბურგში იქნება მინისტრთა კომიტეტის სხდომა და ვნახოთ, ევროსაბჭოს როგორი რეაქცია ექნება“, - განაცხადა კახიძემ.
ყოფილ პრემიერ-მინისტრსა და შს ყოფილ მინისტრს ვანო მერაბიშვილს ვადაზე ადრე გათავისუფლებაზე უარი ეთქვა. ამის შესახებ „ინტერპრესნიუსს“ სპეციალურ პენიტენციურ სამსახურში განუცხადეს. უწყების ცნობით, უდოს კომისიამ მერაბიშვილის საქმეზე 11 აპრილს იმსჯელა და მის ვადაზე ადრე გათავისუფლებაზე უარყოფითი გადაწყვეტილება მიიღო.