სახალხო დამცველის მოადგილის, გიორგი ბურჯანაძის განცხადებით, ვენეციის კომისიას არასდროს ჰქონია რეკომენდაცია იმის თაობაზე, რომ იუსტიციის საბჭოს მიერ გადაწყვეტილებების მიღების ფარულობა კარგია.

როგორც ბურჯანაძემ პარლამენტში გამართულ შეხვედრაზე „ქართული ოცნების“ დეპუტატების საპასუხოდ განმარტა, თავის დროზე ვენეციის კომისიამ მიზანშეწონილად ჩათვალა მოსამართლეთა კონფერენციის მიერ იუსტიციის საბჭოს წევრების ფარული კენჭისყრით არჩევა და ასევე სასამართლოს თავმჯდომარეების ფარული კენჭისყრით დანიშვნა, მაგრამ არასდროს უთქვამს, რომ თავად იუსტიციის საბჭოში ფარული კენჭისყრის პროცესი კარგია.

როგორც ცნობილია, საერთო სასამართლოების შესახებ კანონში დაგეგმილი ცვლილებებით, იუსტიციის უმაღლესი საბჭო მოსამართლეობის კანდიდატების შერჩევის ყველა ეტაპზე გადაწყვეტილებას ფარული კენჭისყრით მიიღებს.

მმართველმა გუნდმა, ღია კენჭისყრის ამოქმედებაზე ვენეციის კომისიის რეკომენდაცია არ გაითვალისწინა და ამ კონტექსტში აქცენტი კომისიის 2013 წლის რეკომენდაციებზე გააკეთა.

ამასთან, როგორც პარლამენტში გამართულ შეხვედრაზე ითქვა, ღია კენჭისყრა საბჭოს წევრების დაცულობას ვერ უზრუნველყოფს.