საქართველოს პარლამენტთან სამართლიანი სასამართლოს მოთხოვნით იურისტების მიერ გამართულ საპროტესტო აქციას დამოუკიდებელი დეპუტატები ეკა ბესელია და ზვიად კვაჭანტირაძეც შეუერთდნენ.
როგორც ეკა ბესელიამ ჟურნალისტებს განუცხადა, ის სრულად იზიარებს აქციის მონაწილეთა მთავარ მოთხოვნას, რომ სასამართლო სისტემიდან ე.წ. კლანი უნდა წავიდეს და „საერთო სასამართლოების შესახებ" არსებულ კანონპროექტში სრულად მოხდეს ვენეციის კომისიის რეკომენდაციების ასახვა. ეკა ბესელიას თქმით, სასამართლო სისტემის გაჯანსაღებისთვის და პრობლემის მოგვარებისთვის აუცილებელია იუსტიცის საბჭოს შეცვლა, კარგი კანონის მიღება, კონსტიტუციური ცვლილება და უვადოდ მოსამართლეთა არჩევის შეჩერება.
„ჩვენ ძალიან ბევრი წლის განმავლობაში ყველა ერთად ვიბრძოდით სასამართლოს დამოუკიდებლობისთვის. რომ გადავხედოთ, ბოლო 15-20 წელი ამ ქვეყანაში სულ სასამართლოს დამოუკიდებლობისთვის მიმდინარეობს ბრძოლა. ყველა ხელისუფლება ცდილობს, სასამართლო თავისი გავლენის ქვეშ მოაქციოს. მოვედი სოლიდარობისთვის. აქ ძალიან ბევრი ჩემი თანამებრძოლია, რომელთან ერთადაც ქუჩაში წლების განმავლობაში მიბრძოლია სააკაშვილის რეჟიმის დროს“, - განაცხადა ბესელიამ.
აქციაზე იმყოფებიან ადვოკატთა ასოციაციის ყოფილი თავმჯდომარე ზაზა ხატიაშვილი, ყოფილი სახალხო დამცველი უჩა ნანუაშვილი, უზენაესი სასამართლოს ყოფილი თავმჯდომარის ნინო გვენეტაძის თანაშემწე კახა წიქარიშვილი, იურისტი კახა კოჟორიძე, სამოქალაქო სექტორის წარმომადგენლები და სხვა იურისტები. მათი განცხადებით, სასამართლო სისტემას უნდა მოშორდეს ე.წ. კლანი, წინააღმდეგ შემთხვევაში სასამართლო დამოუკიდებელი ვერ იქნება.