პარლამენტმა ეკა ბესელიას და 12 დეპუტატის მიერ ინიცირებული კანონპროექტი, რომელიც უზენაეს სასამართლოში, მოსამართლეთა არჩევის წესსა და შერჩევის კრიტერიუმებს შეეხება, შესაძლოა დღეს განიხილოს.

როგორც ბესელიამ "ინტერპრესნიუსს" განუცხადა, იმ შემთხვევაში, თუ მოსმენა მმართველი გუნდის ინიცირებული კანონპროექტის მესამე მოსმენამდე არ მოხდება, განხილვას აზრი დაეკარგება.

დეპუტატი იმედოვნებს, რომ პროექტის გაცნობისა და მასში არსებული პრინციპების გათვალისწინების შემთხვევაში, ირაკლი კობახიძისა და უმრავლესობის დეპუტატთა ნაწილის კანონპროექტი მეორე მოსმენაზე დაბრუნდება.

"შესაძლოა, დღეს მოხდეს ჩვენი კანონპროექტის პირველი მოსმენით განხილვა. სხვაგვარად აზრი დაეკარგება მოსმენას, თუ ის კობახიძის კანონპროექტის მესამე მოსმენამდე არ განიხილეს. თუ რაღაც ელემენტარულ ლოგიკას იცავს პარლამენტი, მაშინ პირველი მოსმენით უნდა მოხდეს ამ პრინციპების მოსმენა, რაც საერთო პოზიციაა და ის ცუდი კანონპროექტი, რასაც მესამე მოსმენა სჭირდება და მეტი აღარაფერი დარჩა, იქნებ მეორე მოსმენაზე დააბრუნონ“, - განაცხადა ეკა ბესელიამ.