დეპუტატები გია ჟორჟოლიანი და ბექა ნაცვლიშვილი 1 მაისის უქმე დღედ გამოცხადებას ითხოვენ. როგორც „ინტერპრესნიუსს" დეპუტატმა გია ჟორჟოლიანმა განუცხადა, აღნიშნულთან დაკავშირებით, დღეს მათ კანონპროექტი პარლამენტს წარუდგინეს. მისივე განცხადებით, პირველ მაისს დასვენება, შრომითი უფლებების საერთაშორისო დღეს უკავშირდება. დეპუტატის თქმით, თუ სახელმწიფოს დეკლარირებული აქვს ევროპული პოლიტიკა, ის უნდა იქცეოდეს ისე, როგორც სხვა ევროპული სახელმწიფოები.
„ბექა ნაცვლიშვილთან ერთად შევიტანე კანონპროექტი, რომ 1 მაისი გამოცხადდეს უქმე დღედ. თუ გინდა ევროპა და ვართ ევროპული ქვეყანა, მოვიქცეთ ისე, როგორც იქცევიან ევროპაში. პირველი მაისი არის დასვენების დღე, ასე იქცევა ევროკავშირი, აღიარებს ამ დღეს. ეს დღე მინდა მივულოცო როგორც მშრომელებს, ასევე განსაკუთრებით მათ, ვისაც შრომა უნდა და არ აქვთ ამის შესაძლებლობა, ასეთი ჩვენს ქვეყანაში ბევრია", - აღნიშნა გია ჟორჟოლიანმა.