პარლამენტმა უზენაესი სასამართლოს მოსამართლეების არჩევის წესზე დეპუტატ ეკა ბესელიასა და მისი 12 კოლეგის საკანონმდებლო პაკეტი ჩააგდო.

“საერთო სასამართლოების შესახებ“ ორგანულ კანონში ცვლილების პროექტს და თანმდევ კანონპროექტებს კენჭი პირველი მოსმენით უყარეს. მას მხოლოდ 29 დეპუტატმა დაუჭირა მხარი, პარლამენტის რვა წევრმა კი პროექტის წინააღმდეგ მისცა ხმა.

ამ შედეგით დეპუტატ ეკა ბესელიას საკანონმდებლო პაკეტი ჩავარდა.

პარლამენტის დამოუკიდებელმა წევრმა ეკა ბესელიამ საკანონმდებლო პაკეტი პირველი მოსმენით გუშინდელ პლენარულ სხდომაზე წარადგინა.

ბესელიას შეფასებით, კანონპროექტში პრინციპების დონეზე გაზიარებულია ის რეკომენდაციები, რაც ვენეციის კომისიას, ეუთოს/ოდირს და საერთაშორისო პარტნიორებს ჰქონდათ.

მომხსენებელმა აღნიშნა, რომ წარმოდგენილი კანონპროექტით, უზენაეს სასამართლოში მოსამართლეთა არჩევისთვის შემოთავაზებულია ღია და გახსნილი კონკურსი, ყოველგვარი ბარიერების გარეშე. ასევე, კანონპროექტის მთავარი პრინციპი არის ის, რომ პარლამენტმა უნდა მიიღოს მოსამართლეობის კანდიდატების გრძელი სია, ხოლო სიის მიღების შემდეგ, პარლამენტის იურიდიულ საკითხთა კომიტეტში განხილვის ხანგრძლივი პროცესი დაიწყება.

დღესვე, პარლამენტმა უზენაესი სასამართლოს მოსამართლეების არჩევის წესთან დაკავშირებით უმრავლესობის საკანონმდებლო პაკეტი მესამე მოსმენით დაამტკიცა.