საპარლამენტო უმრავლესობის დეპუტატი რომან კაკულია, ზუგდიდის მე-6 საჯარო სკოლის ყოფილი დირექტორის ია კერზაიას საქმეზე შს მინისტრის გიორგი გახარიას პოზიციით დაინტერესდა. კაკულიამ პარლამენტის პლენარულ სხდომაზე, სადაც „მინისტრის საათის“ ფარგლებში გიორგი გახარიას უსმენენ შს მინისტრს გამოუძიებელ საქმეებთან დაკავშირებით მიმართა.
„გამოუძიებელ საქმეებზე ვემიჯნები იმ ეპითეტებს, რითაც მომართვა მოხდა თქვენზე, მაგრამ ამ ეპითეტების გარეშეც მინდა ვიცოდე თქვენი პოზიცია სხვადასხვა გამოუძიებელი საქმეების მიმართ. სხვადასხვა საქმის ერთ კონტექსტში განხილვა ცხადია სწორი არ იქნება, მაგრამ ია კერზაიას საქმეზე ნამდვილად მინდა ვიცოდე რა პოზიცია აქვს სამინისტროს. პარლამენტში ოპოზიციის მხრიდან პრეზენტაცია გაკეთდა და ის ინფორმაცია, რაც იქ იყო წარმოდგენილი, ან უარყოფილი უნდა იყოს, ან შედეგი ნამდვილად უნდა დადგეს. ეს ყველას ინტერესებში შედის“, - განაცხადა რომან კაკულიამ.