საპარლამენტო უმრავლესობის წევრის სოფო კილაძის განცხადებით, სახელმწიფო უსაფრთხოების სამსახურის დამსახურებაა, რომ საქართველო უსაფრთხოების კუთხით სხვადასხვა საერთაშორისო კვლევებში მოწინავე ადგილზეა. ამის შესახებ კილაძემ ჟურნალისტებს პლენარულის სხდომის დაწყებამდე განუცხადა, სადაც სუსი-ს ხელმძღვანელის ვახტანგ გომელაურის ყოველწლიური ანგარიშის წარდგენა იგეგმება.
„ჩვენ ვხედავთ, რომ სხვადასხვა საერთაშორისო რეიტინგებში, უსაფრთხოების კუთხით საქართველო მოწინავე ადგილზეა ისეთ რთულ რეგიონში, რომელშიც ჩვენ გვიწევს ყოფნა, ვფიქრობ, რომ ამის უკან დგას უსაფრთხოების სამსახურის ძალიან გამართული და ნაყოფიერი საქმიანობა. თუმცა, იმავდროულად ჩვენ გვაქვს კითხვები, მათ შორის მაჩალიკაშვილის საქმესთან დაკავშირებით, რომ ოჯახი ეძებს სამართალს და ჯერჯერობით, მან ეს სამართალი ვერ იპოვა. ამ საქმეს იძიებს პროკურატურა, თუმცა, რა თქმა უნდა, ძალიან საინტერესო იქნებოდა ვახტანგ გომელაურის კომენტარი ამ თემასთან დაკავშირებით და ჩვენ მას კითხვას აუცილებლად დავუსვამთ", -განაცხადა სოფო კილაძემ.