„დემოკრატიული მოძრაობის“ ლიდერი ნინო ბურჯანაძე დიპლომატიური კორპუსის წარმომადგენლებთან შეხვედრებს აგრძელებს. დღეს შეხვედრა სომხეთის საგანგებო და სრულუფლებიან ელჩთან რუბენ სადოიანთან გაიმართა. ამის შესახებ „ინტერპრესნიუსს“ „დემოკრატიული მოძრაობიდან“ აცნობეს.
როგორც ნინო ბურჯანაძემ განაცხადა, შეხვედრისას ხაზი გაესვა, თუ რამდენად მნიშვნელოვანია კავკასიაში, ორ ქრისტიანულ სახელმწიფოს შორის იყოს კეთილმეზობლური ურთიერთობა, საქართველო და სომხეთი კი საუკუნეების განმავლობაში ერთმანეთის სტრატეგიული პარტნიორები იყვნენ და ეს უკვე ტრადიციად ქცეული ურთიერთობა მომავალშიც აუცილებლად უნდა გაგრძელდეს.
ნინო ბურჯანაძემ ქვეყანაში შექმნილ რთულ სიტუაციასა და „დემოკრატიული მოძრაობის“ სამომავლო გეგმებზე ისაუბრა.
„შეხვედრის მთავარი მიზანია, სომხეთის ელჩს ქვეყანაში მიმდინარე პოლიტიკური პროცესების ჩემეული ხედვა და ასევე, ჩემი და ჩემი გუნდის მიზნები და სამომავლო გეგმები გავაცნო. ელჩთან საუბრისას აღვნიშნე, რომ „დემოკრატიული მოძრაობა“ აუცილებლად იბრძოლებს ხელისუფლებაში მოსასვლელად, რათა მოაგვაროს ის პოლიტიკური და სოციალური პრობლემები, რომლის წინაშეც დღეს საქართველო დგას“, - განაცხადა ბურჯანაძემ.