ჯარს უყვარს შავლეგო ტაბატაძე და შავლეგოს პროფესიონალიზმი სჭირდება ჯარს, - ამის შესახებ პარლამენტის თავდაცვისა და უსაფრთხოების კომიტეტის თავმჯდომარე, ირაკლი სესიაშვილმა ჟურნალისტებს განუცხადა, როდესაც უპასუხა კითხვას, ჩაანაცვლებს თუ არა შავლეგ ტაბატაძე თავდაცვის მინისტრის პოსტზე ლევან იზორიას.
სესიაშვილი ლევან იზორიას თვდაცვის მინისტრის პოსტიდან წასვლას გამორიცხავს და განმარტავს, რომ იზორია თავის სამსახურს ღირსეულად გააგრძელებს. რაც შეეხება ტაბატაძეს, სესიაშვილის თქმით, იმერეთის გუბერნატორის პოსტზე ტაბატაძემ კარგად იმუშავა, თუმცა ახლა, თუ ჯარს დაუბრუნდება, ეს მისასალმებელია.
„ მე არც ინფორმაცია მაქვს და არც მოლოდინი მაქვს, რომ მინისტრების შეცვლა იგეგმება. ბატონ ლევანს, რამდენიმე დღის წინ ჰქონდა პარლამენტში გამოსვლა და ერთმნიშვნელოვნად უნდა ვთქვა, რომ ლევანი არის ერთ-ერთი გამორჩეული რეფორმატორი, რაც აღიარებულია. ამ უწყებაში მიღწეული შედეგები აღიარებულია საერთაშორისო საზოგადოების მხრიდან. მას სრული მხარდაჭერა აქვს პარლამენტისგან, კომიტეტისგან და მე, დარწმუნებული ვარ, რომ ლევანი ღისრეულად გააგრძელებს თავის სამსახურს.
რაც შეხება ბატონ შავლეგოს, შავლეგოც ყოველთვის ღირსეული ოფიცერი იყო. მე, მსმენია, რომ როგორც გუბერნატორმა, ძალიან კარგად იმუშავა და ის რეგიონის ერთ-ერთი წარმატებული ხელმძღვანელი იყო. იმასაც გეტყვით, რომ ჯარში ძალიან გაუხარდებათ, თუ ის დაბრუნდება. მე, როგორც გავეცანი ინფორმაციას, მას სურს, რომ დაუბრუნდეს თავის პროფესიას. ამაში მე მხოლოდ პოზიტივს ვხედავ და მივესალმები იმიტომ, რომ ჯარს უყვარს შავლეგო და შავლეგოს პროფესიონალიზმი სჭირდება ჯარს’, - განაცხადა სესიაშვილმა.