ჭყონდიდის მიტროპოლიტი, მეუფე პეტრე მამა გიორგი მამალაძეს უახლოეს დღეებში შეხვდება.

როგორც მეუფე პეტრემ „რუსთავი2“-ს განუცხადა, ცოტა ხნის წინ დეკანოზმა პენიტენციური დაწესებულებიდან დაურეკა და უთხრა, რომ მასთან გასაუბრება სურს.

ჭყონდიდის მიტროპოლიტმა ასევე ისაუბრა დეკანოზის შეწყალების საქმესთან დაკავშირებით საპატრიარქოში გამართული შეხვედრის შესახებ. მისი თქმით, აღდგომის დღესასწაულამდე ცოტა ხნით ადრე პატრიარქისა და რამდენიმე სასულიერო პირის შეხვედრაზე ერთ-ერთმა მღვდელმთავარმა საუბარი „ციანიდის საქმესა“ და დეკანოზ გიორგი მამალაძის შეწყალებაზე დაიწყო.

„მე პირადად მისი უწმინდესობის გულწრფელობაზე გული მაქვს გატეხილი. მარხვის დაწყებამდე მღვდელმთავართა ჯგუფი მას ეახლა, ისაუბრეს და პატრიარქმა მათ დაავალა, გიორგი მამალაძის შეწყალებაზე პრეზიდენტის მიმართ საშუამდგომლო წერილი მოეზადებინათ. 2 თვის განმავლობაში რით ვერ დაიწერა ან რატომ არ დაიწერა წერილი, ბუნებრივია, ამაზე მღვდელმთავართა ამ ჯგუფმა უნდა გასცეს პასუხი“, - განაცხადა მეუფე პეტრემ.