2019-2020 წლის სამთავრობო პროგრამა გაწერილია და თუ რომელიმე რგოლი ამ პროგრამის რომელიმე ნაწილის შესრულებას ვერ შეძლებს, მიღებული იქნება შესაბამისი საკადრო გადაწყვეტილებები, - ამის შესახებ პრემიერ-მინისტრმა მამუკა ბახტაძემ საკადრო ცვლილებებთან დაკავშირებით დასმული კითხვის პასუხად განაცხადა.

პრემიერ-მინისტრმა განმარტა, რომ უახლოეს მომავალში საკადრო ცვლილებები არ იგეგმება.

„მე და ჩემმა გუნდმა მთავრობის დამტკიცებისას საქართველოს პარლამენტში ახალი სამთავრობო პროგრამა წარვადგინეთ. ჩვენ გვაქვს გაწერილი ჩვენი პროგრამა 2019-2020 წლებზე. ჩვენი საბიუჯეტო რესურსი ამ ორი წლის განმავლობაში იქნება ჯამურად დაახლოებით 26-27 მილიარდი ლარი. ბუნებრივია, არ მაქვს იმის ილუზია, რომ ჩვენ ამ რესურსით შევძლებთ საქართველოს წინაშე არსებული ყველა პრობლემის დაძლევას, მაგრამ, ეს არის ძალიან მნიშვნელოვანი რესურსი, რათა ჩვენი მოქალაქეების ცხოვრების პირობები გავაუმჯობესოთ, შევეხიდოთ მათ იმ პრობლემების დაძლევაში, რომელიც, სამწუხაროდ, ობიექტურად დღეს საქართველოში გვაქვს. აქედან გამომდინარე, ჩემი შეფასებაც არის ასეთი, რომ თუ რომელიმე რგოლი ამ პროგრამის შესრულებისას, რომელსაც სჭირდება საკმაოდ სწრაფი ტემპები, მენეჯმენტის ძალიან მაღალი ხარისხი, ვერ შეძლებს რომელიმე ნაწილის შესრულებას, რა თქმა უნდას ჩვენ ვართ გუნდი და მივიღებთ შესაბამის გადაწყვეტილებას. მათ შორის ეს იქნება საკადრო გადაწყვეტილებებიც“,- განაცხადა ტელეკომპანია „იმედის“ გადაცემა „ქრონიკაში“ პრემიერ-მინისტრმა.

ინფორმაციას მთავრობის ადმინსიტრაციის პრესსამსახური ავრცელებს.