საქართველოს პრემიერ-მინისტრ მამუკა ბახტაძეს საპატიო ხონელის სტატუსი მიენიჭა. შესაბამისი ჯილდო მთავრობის მეთაურს დღეს ხონის ბულვარში, ხონელობის სახალხო დღესასწაულისადმი მიძღვნილ ღონისძიებაზე გადასცეს.
როგორც „ინტერპრესნიუსს“ პრემიერ-მინისტრის პრესსამსახურიდან აცნობეს, მამუკა ბახტაძემ ბულვარში შეკრებილ მოსახლეობას ხონელობის სახალხო დღესასწაული და გიორგობა მიულოცა და აღნიშნა, რომ ხონში სტუმრობა მისთვის ყოველთვის დიდი ემოციური დატვირთვის მატარებელია.
მამუკა ბახტაძემ სიტყვით გამოსვლისას რეგიონში დაგეგმილ ინფრასტრუქტურულ პროექტებზეც ისაუბრა.
„მე, როგორც ყველა ხონელი, განსაკუთრებით ვამაყობ ჩემი ფესვებით. ხონი უნიკალური, ულამაზესი კუთხეა, რომელმაც ძალიან ბევრი ქართული ფასეულობა და ტრადიცია შეუნარჩუნა ჩვენს სამშობლოს. ხონი არის კუთხე და ქალაქი, რომელიც განათლებას განსაკუთრებით აფასებს. თქვენი თხოვნის შესაბამისად, ყველა სკოლა, რომელიც ამას საჭიროებს, დროულად იქნება რეაბილიტირებული. წლის ბოლომდე დავასრულებთ ახალი პროფესიული სასწავლებლის მშენებლობას და მასთან ერთად ავაშენებთ ყველაზე თანამედროვე ახალგაზრდულ ცენტრს. გპირდებით, ხონი იქნება ძალიან წარმატებული და დიდი ენერგიით სავსე ქალაქი, სადაც გვეყოლება ყველაზე მეტი ტურისტი და იქნება ნამდვილი იმერული, გულანთებული სტუმარ-მასპინძლობა”, - განაცხადა პრემიერ-მინისტრმა.
მამუკა ბახტაძე დღესვე ხონში დღესასწაულთან დაკავშირებით გამართულ მსვლელობას შეუერთდა და მინისტრთა კაბინეტის წევრებთან ერთად ხონის წმინდა გიორგის სახელობის ტაძარში საზეიმო წირვას დაესწრო.