გიორგი ქობულია - თუ პარლამენტში მიმიწვევენ და მომთხოვენ პასუხს, აბა მოგვიყევი მინისტრო რა გააკეთეო, მოვალედ ჩავთვლი თავს, რომ მივიდე
თუ მიმიწვევენ და მომთხოვენ პასუხს, აბა მოგვიყევი მინისტრო რა გააკეთე, რა კეთდებოდა, რის გაკეთებას აპირებდი, მაშინ მე მოვალედ ჩავთვლი თავს, რომ მივიდე პარლამენტში,- ამის შესახებ „ინტერპრესნიუსს“ ეკონომიკისა და მდგრადი განვითარების ყოფილმა მინისტრმა გიორგი ქობულიამ პარლამენტში შესაძლო მისვლასთან დაკავშირებით განუცხადა.
ყოფილი მინისტრი განმარტავს, რომ საკანონმდებლო ორგანოში მაშინ მივა, იქ თუ შესაბამისი მიწვევა და დაინტერესება იქნება.
„ჟურნალისტმა დამისვა კითხვა - ერთ-ერთი მიზეზი თქვენი გათავისუფლების იყო ის, რომ ცუდად მართავდით სამინისტროსო, რაზეც მე ვუპასუხე, რომ ეს ასე არ არის. მე საერთოდ არ მესმის, რას ნიშნავს სამინისტროს ცუდი მართვა და ეს ვერავინ ამიხსნა. თუ ვინმე დაინტერესდება იმ შედეგებით, რომელსაც ამ მოკლე ვადაში მივაღწიეთ, მზად ვარ ანგარიში წარვადგინო და მერე ვიმსჯელოთ, ცუდად ვმართავდი თუ არა. ვინაიდან მთავრობაში და პრემიერთან ეს ანგარიში წარდგენილი გვაქვს, მე ვთქვი, რომ პოტენციურად პარლამენტის დარგობრივი ეკონომიკის კომიტეტში შეიძლებოდა ამ ანგარიშის წარდგენა,“ - განაცხადა ქობულიამ.
