საქართველოს საელჩოებს უცხოური ბაზრის მონიტორინგი დაევალათ, რათა ქართული სამეურნეო პროდუქტის, ღვინის ფალსიფიკაცია თავიდან იქნას აცილებული, - ამის შესახებ საგარეო ურთიერთობათა კომიტეტის სხდომაზე საგარეო საქმეთა მინისტრის მოადგილემ ალექსანდრე ღვთისიაშვილმა განაცხადა. მისი თქმით, აღნიშნული პროცესის შედეგად, სავარაუდო ყალბი პროდუქტის იდენტიფიცირება ხდება, რის შემდეგაც შესაბამისი უწყებები ერთობლივი ძალისხმევით პრობლემის აღმოფხვრაზე მუშაობენ.

„საელჩოებს დავალება აქვთ მიცემული, რომ არსებულ ბაზრებზე მონიტორინგი გააკეთონ, ძირითადად ჩვენი სასოფლო სამეურნეო პროდუქტი, ეს არის ღვინო და რომ არ მოხდეს ფალსიფიკაცია, გაყალბება და შესაბამისად ამ მიმართლებით მუშაობენ ჩვენი საელჩოები. სავარაუდო ყალბი პროდუქტის იდენტიფიცირებას აკეთებენ, რომლის შესახებაც ინფორმაციას დედაქალაქს აწვდიან. შემდეგ უკვე ჩვენ, სამინისტრო და შესაბამისი უწყებები, ამ შემთხვევაში - საქპატენტი ერთობლივი ძალებით ვებრძვით ფალსიფიკაციას და გაყალბებას“,-განაცხადა ალექსანდრე ღვთისიაშვილმა.

საგარეო ურთიერთობათა კომიტეტში, 2018 წლის განმავლობაში გაწეულ საქმიანობასა და სამომავლო ნაბიჯებთან დაკავშირებით, საქართველოს საგარეო საქმეთა მინისტრის მოადგილე ალექსანდრე ღვთისიაშვილს უსმენენ.