პარტია ,,ქართული ოცნების“ ზუგდიდის მერობის კანდიდატი გიორგი შენგელია ,,ერთიანი ნაციონალური მოძრაობის“ კანდიდატს სანდრა რულოვსს დებატებში იწვევს. როგორც „ინტერპრესნიუსს“ „ქართული ოცნების“ პრესსამსახურიდან აცნობეს, შენგელია სანდრა რულოვსს დებატებს საზოგადოებრივი მაუწყებლის ეთერში სთავაზობს, რადგან „იმედში“ მისვლაზე რულოვსმა უარი განაცხადა.

შენგელიას განცხადებით, დებატები ზუგდიდის მოსახლეობას მეტი ინფორმაციის მიღების საშუალებას მისცემს.

,,ჩვენი ოპონენტები ხშირად აპელირებენ სხვადასხვა საკითხზე - მე მინდა დღესვე პირდაპირ ეთერში მოვიწვიო ქალბატონ სანდრა რულოვსი დებატეში ,,საზოგადოებრივი მაუწყებლზე“, სადაც შეგვეძლება, ყველა საკითხზე პირისპირ ვისაუბროთ პირდაპირ ეთერში, გავხდეთ ხალხისთვის თვალსაჩინო, რადგან ზუგდიდელი ხალხი იმსახურებს მეტ კომუნიკაციას.

ზუგდიდის მერობა, ეს არ არის ზოგადი პოლიტიკური ინტერესების მიმართულება. ზუგდიდის მერი უნდა იყოს ხალხის მერი, ხალხის გვერდში მდგომი სხვადასხვა საკითხების გადაწყვეტაში. ამიტომ ურთიერთობდე მხოლოდ ერთ პოლიტიკურ ძალასთან და მოსახლეობას გაურბოდე შიშის გამო, რომ რამე კრიტიკული არ მოისმინო, ეს არის ჩვენთვის ყოვლად მიუღებელი. სამწუხაროდ, ეს ჩვენს ოპონენტებს წინასაარჩევნო ფონად გასდევს.’’ - განაცხადა შენგელიამ ტელეკომპანია „იმედის“ ეთერში.