ვაკის პარკში ფაშიზმზე გამარჯვების დღესთან დაკავშირებით დილიდან ომის ვეტერანები, საზოგადოებისა და ხელისუფლების წარმომადგენლები იკრიბებიან და მეორე მსოფლიო ომში დაღუპულთა ხსოვნას პატივს მიაგებენ.

უცნობი ჯარისკაცის საფლავთან შეკრებილ ვეტერანებს ფაშიზმის დამარცხების 74-ე წლისთავს ულოცავენ და აღნიშნავენ, რომ საქართველომ ამ მსოფლიო საფრთხესთან ბრძოლაში ასეულ ათასობით მებრძოლი დაკარგა, ომის ვეტერანებს კი განსაკუთრებული ყურადღება და მოფრთხილება სჭირდებათ.

ვაკის პარკში გამართულ ღონისძიებაზე მერიის ბიჭუნათა კაპელა, ორკესტრი ბიგ ბენდი და თავდაცვის ორკესტრი მეორე მსოფლიო ომისდროინდელ მარშებს ასრულებენ.

პრემიერ-მინისტრის ბრძანებით, წელს პირველად ომის ვეტერანებს 600 ლარი, ხოლო მარჩენალდაკარგულებს 300 ლარი გადაეცემათ.

ამ დროისათვის საქართველოს რეგიონებში 300, ხოლო თბილისში 190 ვეტერანია რეგისტრირებული.

1945 წლის 8 მაისს, ფაშისტურმა გერმანიამ ყველა ფრონტზე უსიტყვო კაპიტულაცია გამოაცხადა, მსოფლიოში ფაშიზმზე გამარჯვების დღე 8-9 მაისს აღინიშნება.