დღეს ღიად მოვისმინეთ, რომ პარლამენტის კომიტეტის მუშაობას აზრი და უფლებამოსილება აქვს მხოლოდ მაშინ, თუ ამ სხდომაზე "ქართული ოცნების" წევრები არიან უმრავლესობაში,- ამის შესახებ "ევროპული საქართველოს"ლიდერმა დავით ბარქაძემ ჟურნალისტებს დარგობრივი ეკონომიკის სხდომის გადადებასთან დაკავშირებით განუცხადა. მისი თქმით, კომიტეტის თავმჯდომარემ არამხოლოდ დაარღვია რეგლამენტი, არამედ გამოხატა თავისი დამოკიდებულება ოპოზიციისა და საწინააღმდეგო აზრის მიმართ.
"დღეს ღიად მოვისმინეთ, რომ კომიტეტის მუშაობას აზრი და უფლებამოსილება აქვს მხოლოდ მაშინ, თუ ამ სხდომაზე "ქართული ოცნების" წევრები არიან უმრავლესობაში, ხოლო როდესაც "ქართული ოცნების" წევრები არ მობრძანდებიან კომიტეტზე, მათ შორის ისეთ მნიშვნელოვან საკითხებზე სასაუბროდ, როგორიც არის ქართული ეკონომიკის მდგომარეობა, ესე იგი კომიტეტის მუშაობას აზრი არ აქვს. ეს არის პირდაპირ არა მხოლოდ რეგლამენტის დარღვევა, ეს არის დამოკიდებულების გამოხატვა ოპოზიციის მიმართ, განსხვავებული აზრის მიმართ და ეს არის დამოკიდებულების გამოხატვა ჩვენი საზოგადოების პრობლემების მიმართ. გიორგი ქობულია პარლამენტში უნდა მობრძანდეს არა პირად თემებზე საჭორაოდ, არამედ იმ განცხადების განმარტებისთვის, სადაც მან თქვა, რომ მას ხელს უშლიდნენ ეკონომიკის განვითარებაში. ეკონომიკა, გაჭირვება და სიღარიბე დღეს ჩვენი ქვეყნის მთავარი პრობლემაა, ამიტომ ჩვენ აუცილებლად უნდა მოვისმინოთ ბატონი ქობულიას პოზიცია, ვინ უშლიდა ხელს მას პრობლემების მოგვარებაში,"- განაცხადა ბაქრაძემ.
დარგობრივი ეკონომიკის კომიტეტის სხდომაზე ოპოზიციონერი და დამოუკიდებელი დეპუტატები გიორგი ქობულიას საკომიტეტო მოსმენის საკითხის კენჭისყრაზე დაყენებას ითხოვდნენ, რასაც თავმჯდომარე რომან კაკულია არ დაეთანხმა და კომიტეტის სხდომა გადადო.