დავით გარეჯთან, საქართველო-აზერბაიჯანის საზღვრის დელიმიტაცია-დემარკაციის საკითხთთან დაკავშირებით შექმნილ კომისიას, რომელიც მთავრობის სხდომაზე დღეს დამტკიცდა, საგარეო საქმეთა მინისტრის მოადგილე, ლაშა დარსალია უხელმძღვანელებს. ამის შესახებ საგარეო საქმეთა მინისტრმა დავით ზალკალიანმა მთავრობის სხდომის დასრულების შემდეგ გამართულ პროსკონფერენციაზე განაცხადა.

როგორც ზალკალიანმა აღნიშნა, კომისიის პირველი სხდომა მომავალ კვირაში სამშაბათს ან ოთხშაბათს გაიმართება.

„როგორც თქვენთვის ცნობილია, დღეს საქართველოს მთავრობამ დაამტკიცა კომისია, რომელსაც უხელმძღვანელებს ჩემი მოადგილე ლაშა დარსალია. კომისიის შემადგენლობა განახლდა და დაკომპლექტებულია სხვადასხვა უწყების წარმომადგენლებით. მიღწეულია შეთანხმება ჩვენს აზერბაიჯანელ პარტნიორებთან, რომ მომავალ კვირაში, სამშაბათს ან ოთხშაბათს გაიმართება კომისიის პირველი სხდომა. იდგმება ძალიან მნიშვნელოვანი ნაბიჯი იქეთკენ, რომ ჩვენ მთავარ სტრატეგიულ პარტნიორთან საზღვრის დელიმიტაცია-დემარკაციის დაკავშირებულ მნიშვნელოვან საკითხზე ვისაუბროთ. მოგეხსენებათ, რომ ჩვენ ვართ სტრატეგიული პარტნიორები და ეს არის სენსიტიური საკითხი. აქედან გამომდინარე, აუცილებელია, ყოველგვარი ემოციები გვერდზე გადავდოთ და კომისიას მიეცეს შესაძლებლობა ნორმალურ ვითარებაში, ისე, როგორც ჩვენს პარტნიორობას შეეფერება განაგრძოს მუშაობა და მიღწეულ იქნას ორივე მხარისთვის მისაღები შედეგები“, - განაცხადა ზალკალიანმა.

იხილეთ ვიდეო: დავით გარეჯთან დაკავშირებით კომისია შეიქმნა, რომელსაც საგარეო საქმეთა მინისტრის მოადგილე უხელმძღვანელებს